БАЛАЛАРҒА БОЛАШАҚ СЫЙЛАЙДЫ
Бала денсаулығын сақтау – мемлекеттің маңызды басымдықтарының бірі. Өкінішке қарай, елімізде соңғы жылдары денсаулығында туа біткен ақауы бар балалардың саны көбейіп келеді. Мұндай балаларға медициналық және әлеуметтік қолдау көрсетудің маңызы зор. Осы мақсатта елімізде оңалту орталықтары ашылуда.
Зарина КӘП
«Семей таңы»
Биыл қаламыздағы «Қамқорлық» оңалту орталығының ашылғанына бір жыл толды. Осыған орай, орталықтың әкімшілігі бүлдіршіндердің, ата-аналардың қатысуымен кеш ұйымдастырды.
— Осыдан 1 жыл бұрын Нұрсұлтан Назарбаев қорының қолдауымен қаламызда ерте араласу орталығы мен балаларды оңалту орталығы ашылды. Осы 1 жылдың ішінде екі орталықта 1355 бала оңалту емшараларын алып, 86 бүлдіршін алғашқы қадамын жасады. Басын ұстай алмайтын 76 сәби ем алып, жағдайлары қалыпқа келді. Мұндай жетістіктерге жетуімізге ата-аналараның да ықпалы мол. Алдағы күндерден үмітіміз мол, денсаулығында кінәраты бар талай баланы оңалтып, қатарға қосамыз деп сенемін,- дейді орталық басшысы Жанар Қабденова.
«Қамқорлық» өңірдегі инновациялық орталық болып табылады. Мұнда нейро-ортопедиялық аурулары, оның ішінде церебралды сал ауруы бар балаларды оңалтудың әлемдік үздік әдістері мен заманауи тәсілдері енгізілген. Мамандар аурудың ерекшеліктерін ескере отырып, әр баланы қалпына келтірудің жеке бағдарламасын әзірлейді. Орталықта қозғалыс дағдыларын дамытатын заманауи технологиялар — оңалтудың арнайы техникалық құралдары, тренажерлер, аппараттар мен аппараттық-бағдарламалық кешендер орнатылған.
— Бұрын біздің қаладағы мүмкіндігі шектеулі балалар Астана, Алматы қалаларына барып, ем алатын. Бұл, бір жағынан, ата-аналардың қалтасына салмақ салатын еді. Біздің орталықтың ашылуы өңір тұрғындарына үлкен үміт сыйлады. Жыл бойғы жұмыс барысында ата-аналармен бірлесіп үлкен жетістіктерге жеттік. Орталықта 50 шақты қызметкер жұмыс істейді. Бір жылда кемінде 1200 баланы оңалтудан өткіземіз,- дейді Семей қаласының перинаталдық орталығының «Қамқорлық» неонаталдық және педиатриялық қызметінің басшысы Гүлжазира Дүйсекенова.
Орталықта сонымен қатар емдік дене шынықтыру, электроэнцефалография, физиотерапия, жарықпен емдеу, су массажы, логопед және дефектологпен күнделікті жеке сабақтар қарастырылған. Иммерсиялық ванна, механотерапия, эрготерапевт және психолог кабинеттері, сенсорлық бөлме, құрғақ ванна жұмыс істейді.
Оңалту орталығы 3 жасқа дейінгі балаларға, ал ерте араласу орталығы 3-тен 18 жасқа дейінгі балаларға арналған. Мұнда жалпы сомасы 207 млн теңгеге медициналық оңалту жабдықтарының 90-нан астам түрі орнатылған. Астана, Мәскеу және Санкт-Петербургте оқып келген арнайы медициналық мамандар жұмыс істейді.
