ИГЕРІЛМЕЙ ЖАТҚАН ЖЕРЛЕР МЕМЛЕКЕТ МЕНШІГІНЕ ҚАЙТАРЫЛУДА
Абай облысының әкімдігінде аймақ басшысының қатысуымен өңірдегі жер қатынастары мен қоғамдық көліктің түйткілді мәселелерін талқылауға арналған жиын өтті.
Зарина КӘП
«Семей таңы»
Қоғамдық кеңес мүшелері де қатысқан жиында облыстың Сыбайлас жемқорлыққа қарсы қызметі департаментінің жетекшісі Әділхан Сабуров жер қатынастары саласында жүргізілген мониторинг нәтижелерін бөлісті.
— Білікті атқарушы органдар тарапынан сауда-саттықты ұйымдастыру және жер учаскелерін беру тәртібін регламенттейтін бизнес процестер арқылы пайдаланылмаған жерлерді қайтару бойынша қабылданған шаралар жеткіліксіз болғанын мойындау қажет. Жайылымдық жерлерді барлық шаруа қожалықтары өз мақсатына сай пайдаланбайды. 2017 жылы жер телімдерін ғимаратпен бірге меншікке беру фактілері орын алған. Алдағы уақытта аталған фактілер бойынша жұмыс жүргізуіміз қажет,- деді Әділхан Сабуров.
Жиында айтылғандай, Абай облысының ауыл шаруашылығы және жер қатынастары басқармасында ауыл шаруашылығы мақсатында пайдаланылмайтын жерлерді қайтару жұмыстарын жандандыру үшін ведомствоаралық комиссия құрылған. 2022 жылдың қорытындысы бойынша, мемлекеттік меншікке 135 жер учаскесі қайтарылыпты. Ал биылғы жылдың басынан бері жалпы ауданы 59,3 мың гектар болатын 4 жер учаскесі қайтарылған.
— Сонымен қатар қалалар мен аудан әкімдерінің жанынан үкіметтік емес ұйымдардың өкілдерін қоса отырып, игерілмей жатқан, өз бетінше алынған жерлерді анықтау бойынша жұмыс топтары құрылды. Өткен жылы пайдаланылмаған және жер заңнамасын бұза отырып пайдаланылған жалпы алаңы 125,84 мың гектарды құрайтын жер учаскелері анықталды. Бұл мәселе бойынша тиісті шаралар қолдану үшін жер ресурстарын басқару басқармасына материалдар жолданды,- деді облыстық ауыл шаруашылығы және жер қатынастары басқармасының басшысы Анзор Абаев.
— Жаңа облысты қалыптастыру мен дамыту барысында мұндай жағдайларды болдырмай, бұл олқылықтарды толығымен жоюымыз керек. Тиісті министрлікпен жұмыс жүргізілуде. Ауыл шаруашылығы және жер қатынастары басқармасына осы мәселелерді пысықтауды тапсырамын,- деді аймақ басшысы Нұрлан Ұранхаев.
Жиында сонымен қатар өткен жылдың соңындағы қалаішілік жолаушылар тасымалы саласындағы мәселелерді шешу жөніндегі хаттамалық тапсырманың орындалу қорытындысы тыңдалып, 2023-2025 жылдарға арналған субсидиялар арқылы автобус жүргізушілерінің жалақысын жыл сайын көтеру, алдағы уақытта қаланың барлық бағыттарына валидатор қою мәселесі пысықталды.
Облыс әкімі Нұрлан Ұранхаев сыбайлас жемқорлыққа қарсы қызмет өкілдерінің алдағы жоспарымен танысып, қатысушылармен Семей қаласын дамыту мәселелерін талқылады.
