Өскемен қаласында бомба жайлы хабардан соң 20 мектептің екінші ауысымдағы оқушылары онлайн форматта оқиды, деп хабарлайды ҚазАқпарат тілшісі.
Қала әкімдігінің мәліметіне сүйенсек, полицияға бомба жайлы хабар түскен соң 20 мектептің екінші ауысымдағы оқушылары қашықтан білім алуға көшірілді.
«Жағдай құқық қорғау органдарының бақылауында. Қазіргі уақытта мектептерді мамандандырылған қызметтер тексеріп жатыр», — делінген ақпаратта.
ШҚО Төтенше жағдайлар департаменті баспасөз қызметінің хабарлауынша, мектептерден эвакуацияланған мұғалімдер мен оқушылар аязда тоңып қалмас үшін құтқарушылар «Вахта» көліктерімен келіп жетті.
Еске салайық, бүгін Өскемен қаласында осы аптада үшінші рет бірнеше мектеп ғимаратына бомба қойылғаны туралы хабар түсті. Қазір мамандандырылған қызметтер нысандарды тексеріп жатыр.
Жарылғыз зат туралы алғашқы хабар 6 ақпанда түсті. Ол кезде сот және мектеп ғимараттары жарылатыны жөнінде айтылды. Шұғыл қызметтер қауіпті заттар таппады.
9 ақпанда мектептерге орнатылған бомба туралы хабарлама тағы түсті. Ол жолы да ақпарат жалған екені анықталды.
