Кеше, 24 ақпан күні, қаламыздағы №42 орта мектепте «Білім беру ұйымдарында ерекше білім беруді қажет ететін оқушыларға қолдау көрсетудің тиімді жолдарын ұсыну» тақырыбында педагогикалық форум өтті. Форумға қаладағы білім беру мекемелерінің басшылары, әлеуметтік педагогтер қатысты.
Бүгінде Абай облысында ерекше білім беруді қажет ететін 2698 бала бар. Сөз басында «ерекше білім беруді қажет ететін оқушы» деген түсінік «мүмкіндігі шектеулі бала» дегенді ғана білдірмейтінін айта кеткен жөн. Форумға қатысқан мұғалімдердің айтуынша, оқудағы қиындықтар, ең алдымен, интеллектуалдық дамуға емес, әр оқушының жеке қабілетіне де байланысты. Облыстық инновациялық-әдістемелік орталықтың директоры Айнұр Исабаева атап өткендей, мемлекеттік білім беру саясаты — қолжетімді білім беруге және әрбір адамның интеллектуалдық және психофизикалық мүмкіндіктерін дамыту қағидасына негізделген. – Әрине, тәрбие үрдісінде отбасының да орны ерекше. Облысымызда ерекше қажеттілігі бар 2698 бала бар. Әр ауданда психологиялықпедагогикалық көмек көрсету кабинеттері жұмыс істейді. Мемлекетіміз әрбір азаматқа, оның ішінде аталған санаттағы азаматтардың да білім алуына етуге мүмкіндік жасайды, – деді Айнұр Исабаева. « П с и х о л о г и я л ы қ — м е д и ц и н а л ы қ — педагогикалық кеңес» мекемесінің әлеуметтік педагогі Елена Изотова ерекше қажеттіліктері бар балалармен жұмыс істеудің маңыздылығын атап өтті. – Кешенді тексеру және кеңес беру жұмыстарын ата-аналардың, білім беру және денсаулық сақтау ұйымдарының бастамасымен білікті дәрігерлер мен мұғалімдер жүргізеді. Тексеру барысында мұғалімдер мен психологтер оқушының әлеуметтік-психологиялық қабілеттеріне талдау жүргізеді. Тексерудің ұзақтығы он бес минуттан бір сағатқа дейін созылады. Ерекше қажеттіліктері бар оқушының барлығы бірдей мүмкіндігі шектеулі адамдардың санатына жатпайды. Сондықтан бұл орайда кешенді тәсіл өте маңызды, — деп атап өтті Елена Изотова. «Abai IT-Valley» технологиялық кластерінің директоры Бауыржан Наурызбаев инклюзивті білім беруге инновациялық технологияларды енгізу туралы сөз қозғады. – Мысалы, жасанды интеллект мұғалімдер мен дефектологтерге үлкен көмек пен қолдау көрсете алады.Айталық, Chat-GPT нейрондық желісі чат ботын пайдалану арқылы дамудың белгілі бір бұзылуын диагностикалау бойынша алғашқы қысқаша кеңес алуға болады. Сонымен қатар технологиялық кластер ерекше білім беруді қажет ететін балалардың ұсақ қол моторикасын дамытуға көмектесетін ұлттық нақыштағы 3D модельдерін әзірлеумен айналысуда,- деді Бауыржан Наурызбаев. Форум барысында мұғалімдер оқушылардың мұндай топтарына жан-жақты қолдау көрсету, сондай-ақ материалды ұсыну әдістерін одан әрі дамыту қажеттігі туралы ортақ пікірге келді.
Айтолқын САМАТОВА,
«Семей таңы»
