Абай облысы мәслихатының VIII шақырылымының бірінші сессиясы өтті. Сессия жұмысына Абай облысының әкімі Нұрлан Ұранхаев, облыс әкімінің орынбасарлары, облыстық аумақтық сайлау комиссиясының төрайымы Наталья Фесенко, мемлекеттік органдар мен ұйымдардың басшылары, құқық қорғау органдарының, бұқаралық ақпарат құралдарының, қоғамдық бірлестік мүшелері мен жаңадан сайланған 28 депутат қатысты.
Әйгерім СӘРСЕНҚАЛИ,
«Семей таңы»
Күн тәртібінде Абай облысы мәслихатының төрағасын сайлау, мәслихаттың тұрақты комиссияларын құру, тұрақты комиссиялардың төрағаларын сайлау және депутаттық фракцияны тіркеу мәселелері қаралды.
Сессия барысында Н.Фесенко сайлау қорытындыларымен таныстырып өтті. Бір мандаттық аумақтық сайлау округтері бойынша 15 депутат, партиялық тізім бойынша «AMANAT» партиясынан 13 депутат, «Respublika» партиясы мен «Қазақстан халық партиясынан» бір-бір депутаттан сайланған.
Халық қалаулыларына төсбелгілер мен куәліктер тапсырылған соң дауыс беру нәтижесінде Қуаныш Сүлейменов Абай облысы мәслихатының төрағасы болып сайланды.
— Облыстық мәслихат сессиясының төрағасы болу — үлкен жауапкершілік әрі абырой. Депутаттардың жұмысын үйлесітіріп, халық пен әкімдік арасын байланыстыра отырып, нәтижелі жұмыс істейміз деген жоспарымыз бар,- деп атап өтті Қуаныш Серқазыұлы.
Сессия барысында тұрақты 5 комиссия құрылып, төрағалары бекітілді. Экономикалық және қаржылық, кәсіпкерлік қызметті дамыту саласындағы тұрақты комиссияға депутат Қанат Әділбай, агроөнеркәсiптiк кешен және экологияны дамыту саласындағы тұрақты комиссияға Уәлихан Майжанов, халықты әлеуметтік қорғау, білім және ғылым, денсаулық сақтау, мәдениет және спортты дамыту саласындағы тұрақты комиссияға Риза Молдашева, депутаттық өкілеттілік, этика және заңдылық мәселелері жөніндегі тұрақты комиссияға Шолпан Чегедекова, өнеркәсіп және жер қойнауын пайдалануды дамыту саласындағы тұрақты комиссияға Бауыржан Қайрамбаев төрағалық ететін болды.
Алда ел игілігі жолында ауқымды жұмыстар күтіп тұрғанын атап өткен облыс әкімі Нұрлан Ұранханхаев VIII шақырылым депутаттарының жұмысына сәттілік тіледі.
Халық қалаулыларының құрамында бұған дейін де бірнеше шақырылымның депутаты болған тәжірибелі азаматтар да, биыл тұңғыш рет халық сеніміне ие болып отырған жастар да бар. Жалпы, 30 депутаттың 6-ауы нәзік жанды болса, 3-еуі — 35 жасқа дейінгі азаматтар. Депутаттардың ең үлкені 67 жаста болса, ең жасы 33-те.
— Халық сенмін ақтауымыз керек. Аймақ әкімдігімен, халықпен бірлесіп Абай облысын дамытудың кешенді жоспарын жүзеге асыруға атсалысамыз. Экономикамыздың өркендеуіне, ауыл шаруашылығы саласын ілгерілетуге, халықтың әл-ауқатын жақсартуға үлес қосу – басты мақсатымыз,- деді тәжірибесі мол депутат Марат Құрманбай.
Биылғы жылғы сайлаудың басты ерекшелігі – депутаттар корпусының құрамына жастардың енуі.
— Тұңғыш рет елімізде депутаттар қатарына жастар еніп отыр. Бұл – жастарға берілген үлкен мүмкіндік. Елімізде қара Ертістің сеңі қозғалғандай сең қозғалуда. Қарапайым халықтың ішінен шыққан жандар қарапайым халықтың мұң-мұқтажын, мәселесін көтереді. Міржақып Дулатұлы айтқандай: «Жақсы болу үшін депутат болу шарт емес. Депутат болу үшін жақсы болу шарт». Бұл қағиданы ұстана отырып, осы уақытқа дейін азды-көпті айтып келе жатқан қоғамдағы қордаланып қалған дүниелерді, тұралап қалған тіршілікті, ғылым-білім, мәдениет, спорт, әр түрлі әлеуметтік жағдайларды депутат ретінде мәселе етіп көтеру мақсатым,- деді жастар квотасымен сайланған ең жас депутат Мерей Қарт.
Осылайша, «Күркіреп күндей өтті ғой соғыс»,- деп Қасым ағамыз айтқандай, біреуді қуантып, біреуді ренжітіп сайлау да өтті. Енді додада бағы жанып, бәйгеден озып келген халық қалаулыларына ойлау қалды. Ал ойланатын мәселе аз емес… Ең бастысы, өздеріне сенім көрсеткен ел аманатын естен шығармаса болғаны.
