Экологиялық екі айлық аясында Семей қаласы әкімдігінің тапсырмасымен қаладағы рұқсат етілмеген қоқыс үйінділері шығарылуда.
Айтолқын САМАТОВА,
«Семей таңы»
Өткен аптада ауа райының қолайсыздығына байланысты тұрғындар қатысатын сенбілік келесі аптаға шегерілді. Десе де коммуналдық қызметтер өз жұмыстарын штаттық режимде жалғастырды.
Атап айтсақ, өткен сенбіде Шығыс кенті тұрғын массивінде 5 бірлік техника тартылып, 140 текше метрден астам, Кірпіш кентінде 7 бірлік техника тартылып, 600 текше метр, Степной кентінде 5 бірлік техника тартылып, 300 текше метр, РСУ-1 ауданында 3 бірлік техника жұмылдырылып, 200 текше метр, Березовский кентінде 3 бірлік техника тартылып, 100 текше метр қоқыс шығарылды. Аталған аумақтардағы санитарлық тазалық жұмыстарының жүргізу барысын қала әкімі Нұрбол Нұрсағатов тексеріп, бірқатар тапсырмалар берді. Бұл күні санитарлық тазалауға және рұқсат етілмеген полигондарды жою жұмыстарына 20 тиегіш пен 50 самосвал көлігі жұмылдырылды.
Сол күні Кірпіш кентіндегі рұқсат етілмеген аумаққа қоқыс төгуге әрекеттенген автокөлік жүргізушісі туралы ақпарат келіп түсті. Көп ұзамай кенттегі учаскелік инспекторлардың арқасында, жоғарыда аталған автокөлік иесі ұсталды. Полицейлер 1962 жылғы қала тұрғынының атына әкімшілік хаттама толтырып, 30 айлық есептік көрсеткіш (103 500 тг) көлемінде айыппұл салды.
Естеріңізге сала кетейік, сенбі күні қаланың шеткері аумақтарындағы бірнеше қоқыс полигондары жойылды. Ондағы мақсат — қаланы қатты тұрмыстық қалдықтардан тазарту. Сонымен қатар өткен сенбіде қалалық әкімдік өкілдері мен полиция басқармасының қызметкерлері көп қабатты тұрғын үйлердің басқарушы органдарына (КСК, ОСИ, ПТ, кондоминум) сенбілікке қатысу туралы хабарламалар таратты.
Айта кетейік, бұдан бұрын қала әкімі Нұрбол Нұрсағатов «ҚТЖ» ҰҚ» АҚ Семей филиалының басшысы В. Бабиченкомен бірлесіп, қаланы пойыз жолдарымен аралаған болатын. Сәйкесінше сол күні қала әкімі «Жансая» базарының маңындағы темір жол жиегін қоқыстан толық тазартуды тапсырған еді. Қала әкімінің тапсырмасына сәйкес, Шағын және орта бизнес субьектілері базар маңындағы аумақты тазартып, темір жол жиегіне санитарлық тазалау жұмыстарын жүргізді.
Айта кету керек, екі айлық санитарлық акция аясында темір жолдардың жиектерінде сенбілік үнемі өткізіліп тұратын болады. Сондай-ақ коммуналдық қызметтер де жол жиектерін қоқыстардан тазартады.
