Өткен сенбі күні Абай облысының әкімі Нұрлан Ұранхаев жұмыс сапарымен Жарма ауданына барып, Қалбатау ауылында тұрғындармен кездесті.
Жадыра ТӨЛЕГЕНҚЫЗЫ,
«Semeı tańy»
Аудан әкімі Жарқынбек Байсабыровтың есебін тыңдаған соң аймақ басшысы Абай облысын және Жарма ауданын дамыту жоспарлары туралы баяндады.
Абай облысы құрылғалы бері халықтың өмір сүру сапасын жақсарту мақсатында аймақтың экономикасын дамытудың жаңа бағыттары әзірленді. Өткен жылдың қорытындысы бойынша экономиканың барлық салаларында оң көрсеткіштер байқалды. Өндіріс саласында 1,1 трлн теңге өнім өндірілсе, оның ішінде Жарма ауданының үлесі — 281,2 млрд теңге.
— Жарма — тоғыз жолдың торабында орналасқан әлеуметтік-экономикалық даму мүмкіндігі жоғары аудан. Аудан экономикасының дамуына «Бақыршық кен өндіру кәсіпорны», «Горняк», «Васильевские»,»Асар Инвест» және «Сарытас» өндіріс орындары ықпал етіп отыр. Кәсіпкерлікті дамыту үшін нақты қолдаулар жасалып отыр. Шағын және орта бизнесте жақсы көрсеткіштер бар. Экономиканы дамытудың негізгі бағыттарының бірі — ауылшаруашылық саласы. Бұл бағыттағы өнім 9,8 пайызға өсті. Ет, сүт, жұмыртқа өндіруде жақсы көрсеткіш бар. «ҚазАгроФинанс» қаржы институты арқылы 310,8 млн теңгеге 23 ауылшаруашылық техникасы алынды. Аудан бойынша 2,4 мың гектар жайылым жер мемлекеттік меншікке қайтарылды. Халықтың өмір сүру сапасын жақсарту үшін тұрғын үй шаруашылық инфрақұрылымын дамыту керек. Біздің басым бағытымыз — тұрғын үй шаруашылық саласындағы мәселелерді шешу, тұрғын үйлер салу,- деп атап өтті Нұрлан Ұранхаев.
Бүгінде Жарма ауданындағы Шар қаласы және 21 ауыл орталықтандырылған су жүйесіне қосылған. Өткен жылы 340 мың шаршы метр тұрғын үй пайдалануға берілді. Өңірдегі негізгі мәселенің бірі — жол сапасы. Бұл бағытта өткен жылы ауданға 894,1 млн теңге бөлініп, 3 жоба іске асты. Жұмыстар осы жылы да жалғасады.
«Ауылды жердегі денсаулық сақтау саласын жаңғырту» ұлттық жобасы аясында облыста 10,8 млрд теңгеге 65 алғашқы медициналық көмек көрсету пункті салынады.
— Медициналық қызметтің әрбір тұрғын үшін қолжетімді болуы — біздің басты міндетіміз. Ұлттық жоба аясында ауданда 7 жаңа медициналық нысан салынып, медициналық мекемелерді қондырғылармен қамтамасыз ету жалғасады. Тағы бір маңызды бағыт – білім беру және тәрбие. Өкінішке қарай, облыста мектептер жетіспейді. Өткен жылы 1700 орынға арналған қосымша 4 жаңа мектеп салынды. 2024-2025 жылдары Жарма ауданында 300 орынға арналған мектеп салу жоспарда бар. Осы жылы өңірдегі мектептерге ағымдағы жөндеу жұмыстарына және күрделі жөндеуге 157,8 млн теңге бөлінді. Сонымен қатар қауіпсіздік шаралары күшейтілуде. Халықты әлеуметтік қорғау және қолдау, жұмыспен қамту шаралары да жүзеге асуда,- деді Н.Ұранхаев.
Жиында айтылғандай, Жарма ауданында техникалық және кәсіптік білімге қолдау жан-жақты көрсетілуде. «Ұлттық білім» жобасы бойынша 2025 жылға дейін жастар техникалық және кәсіптік білім берумен 100 пайыз қамтылады. Сонымен қатар Жарма технологиялық колледжінің жылу жүйелерін жөндеу үшін 13,6 млн теңге, инженерлік жүйеге 24 млн теңге бөлінген. Білім беру мекемесінің материалдық-техникалық базасын жақсарту жұмыстары бизнестің әлеуметтік жауапкершілігі арқылы іске асуда. «Бақыршық кен өндіру кәсіпорны» ЖШС және «Жарма технологиялық колледжі» КММ арасындағы өзара ынтымақтастық арқылы ғимараттың жөндеу жұмыстарына қажетті жаңан тауарлар сатып алу қарастырылған.
Кездесуден соң аймақ басшысы Нұрлан Ұранхаев және басқарма басшылары азаматтарды жеке сұрақтары бойынша қабылдады.
