Semeytany.kz — Абай облысының әкімі Берік Уәлидің төрағалығымен өткен әкімдік отырысында өңірді азық-түлікпен тұрақты қамтамасыз ету және азық-түлік қауіпсіздігін нығайту мәселелері талқыланды. Жиынға облыстық басқармалар мен өңірлік департаменттердің басшылары, сондай-ақ қала және аудан әкімдері қатысты. Күн тәртібіндегі негізгі мәселе бойынша ауыл шаруашылығы басқармасының басшысы Ертай Қуанбаев есеп берді.
Биыл облыста 782,1 мың гектар алқаптан өнім жиналды. Оның 296,5 мың гектарын дәнді дақылдар, 339,4 мың гектарын майлы дақылдар, 5,9 мың гектарын картоп, 5,2 мың гектарын көкөніс-бақша дақылдары құрайды. Дәнді дақылдардың бәрі орылып, 348,9 мың тонна астық бастырылды.
Өнімді сақтау мақсатында өңірде қуаттылығы 173 мың тонна болатын үш лицензияланған элеватор мен шамамен 870 мың тонна астық сақтауға арналған қоймалар жұмыс істейді. Сондай-ақ жалпы сыйымдылығы 51,8 мың тоннаны құрайтын 13 көкөніс қоймасы бар.
Мал шаруашылығы саласында да өсім байқалады. Ірі қара мал саны 784,2 мың басқа, қой-ешкі 1,279 миллион басқа, жылқы 390 мың басқа жеткен. Ет өндіру көлемі 63,7 мың тоннаны, сиыр сүті 275,2 мың тоннаны құрады. Асыл тұқымды мал басының үлесі жыл сайын тұрақты түрде артып келеді.
Облыста 17 бордақылау алаңы жұмыс істейді. 3,2 мың сауын сиырға арналған сегіз сүт-тауарлы ферма мен жеті сүт қабылдау пункті бар. 2024 жылдың алғашқы 10 айында 13,1 мың тонна сүт жиналды. Алдағы жылдары жалпы қуаттылығы 5,4 мың басқа есептелген тоғыз жаңа сүт-тауарлы ферманы салу жоспарланып отыр. Бұл жобалар іске қосылған соң аймақта қосымша 29,7 мың тонна сүт өндіруге мүмкіндік туады. Осыған байланысты индустриялық аймақта сүт зауытын салу мүмкіндігі қарастырылуда.
Агроөнеркәсіп кешенінің экспорттық әлеуеті де артып келеді. Биыл агроөнім экспорты 174,4 миллион АҚШ долларына жетті, оның 76,5 пайызы – өңделген өнім. Әлеуметтік маңызы бар азық-түліктің 19 түрінің 14-і облыстың өзінде өндіріледі.
Өсімдік майы, ұн, макарон, сүт өнімдері, шұжық және ет өндіру бағыттарында жаңа жобалар жүзеге асырылуда. «Qazaq Astyq Group» ЖШС желтоқсан айында тәулігіне 200 тонна тазартылған өсімдік майын шығаратын желіні іске қоспақ. Ал «Eurasia Agro Semey» ЖШС Жаңасемей ауданында ауысымына 35 тонна ет өңдейтін комбинаттың құрылысын жүргізіп жатыр. Бұл жоба 2026 жылдың тамыз айында аяқталады деп жоспарланған.
Отырыс барысында аймақ басшысы жергілікті атқарушы органдардың негізгі міндеті – бекітілген жоспарларды сапалы орындау, азық-түлік қауіпсіздігін қамтамасыз ету және өңірдің ішкі нарығын тұрақты өніммен қамту екенін атап өтті. Ол облыс әкімінің ауыл шаруашылығы саласына жауапты орынбасары Думан Оспановқа, ауыл шаруашылығы басқармасының басшысы Ертай Қуанбаевқа, қала және аудан әкімдеріне саланы дамытуға бағытталған шараларды жүйелі түрде іске асыруды тапсырды.
Мемлекет басшысының тапсырмасына сәйкес өңірдің азық-түлік қауіпсіздігін нығайту мақсатында 2024–2028 жылдарға арналған Жол картасында көзделген нысаналы индикаторларды толық орындап, оның іске асырылуын тұрақты бақылауда ұстау қажеттігі айтылды. Сондай-ақ ауыл шаруашылығы тауарын өндірушілерге мемлекеттік қолдау бағдарламалары туралы түсіндіру жұмыстарын жүйелі жүргізу міндеттелді.
Берік Уәли өз сөзінде Президент Қасым-Жомарт Тоқаевтың биылғы Жолдауында азық-түлік нарығындағы шетелге тәуелділікті азайту аса өзекті міндет ретінде қойылғанын атап өтті. Осыған орай ауыл шаруашылығын кешенді дамыту, фермерлерді жан-жақты қолдау, ауылдық инфрақұрылымды жақсарту және жаңа агротехнологияларды енгізу қажеттігін айтты. Сонымен қатар ішкі нарықты тұрақты өніммен қамтамасыз ету үшін өңдеу өнеркәсібі мен логистиканы күшейтудің маңыздылығын жеткізді.
