К.Нұрбаев атындағы Ақсуат орта мектебінде аудандық білім бөлімінің бастамасымен «Әке — отбасының тірегі» тақырыбында әкелер форумы өткізілді. Аудандық форумға 14 мектептің өкілдері қатысты. Алғаш рет ұйымдастырылып отырған бұл шараның мақсаты ата-аналардың өскелең ұрпақты тәрбиелеудегі жауапкершілігін арттыру, отбасы құндылықтарын насихаттау, әке мен бала арасындағы байланысты жандандыру, мектеп пен қоғамдық ұйымдардың бала тәрбиелеу үрдісіндегі ынтымағын нығайту болды.
Х.СІЛӘМҰЛЫ,
«Semeı tańy»
Әкелер форумына мектепішілік іріктеуден өткендер қатысты. Жиында, негізінен, әкелер өнегесі насихатталып, әке мен баланың өмірге, болашаққа көзқарастарын айқындау мәселесіне көбірек маңыз берілді. Әкелер спартакиадасы ұйымдастырылып, үстел теннисінен, тоғызқұмалақтан, дойбы ойынынан сайыс өткізілді. Қатысушылар сондай-ақ «Әкем және мен – біз спорттық жанұя!» атты спорттық эстафетада сынға түсті. «Менің әкем — ең жақсы адам», «Менің әкем — дарынды әке» атты шығармашылық байқаулар ұйымдастырылды.
Форумға қатысушылар «Менің әкем — ең жақсы әке» атты байқауда әкелер салған суреттер және әкелердің қолымен жасалған бұйымдар қойылған көрмелерді тамашалады. Мектепке демеушілік жасап жүрген әкелер «Алтын жүрек», көп бала тәрбиелеп отырған азаматтар «Батыр әке» аталымдарын иеленді.
Аталған шараға Өкпеті орта мектебінің атынан қатысып, қолөнер бұйымдарын көрмеге ұсынған Әріп Құнафин «Даңқты әке», Жарқын Ердібаев «Батыр әке», Арнұр Жеңісханов «Алтын жүрек» аталымдарына ие болып, алғыс хатпен марапатталды.
Аудандық форумға қатысқан азаматтардың бірі Ринат Маратов — көп балалы әке. Ол үш ұл, екі қыз тәрбиелеп отыр. Ринат темірден, ағаштан, қайыс-теріден өзіне керекті заттарды жасайды екен. Шаруашылығына қажетті техниканың бірі тиегіш тракторды, темір қыздырғыш зат — көрікті өзі жасап алған. Ұлттық ою-өрнек салып ат әбзелдерінің барлық түрлерін, ағаштан ойып, қаптап, ер-тоқым жасаған Ринаттың еңбегі де жоғары бағаланды.
