Түркияның Конья қаласында түркі тілдес халықтар арасында өткен XV халықаралық «Мың тыныс. Бір дауыс» театр фестиваліне Семейдің «Дариға-ай» жастар театрының ұжымы да қатысып қайтты.
А.ӘБІЛ,
«Semeı tańy»
Өнер додасында У.Шекспирдің «Ричард III» (режиссері — Дина Құнанбай) трагедиясымен бақ сынап, лауреат атанды.
— Фестиваль өте жоғары деңгейде өтті. Бірақ ешқандай театрға орын берілген жоқ. Барлық театр ұжымдарына лауреат атағы берілді. Бір атап өтерлігі, өнер додасына Қазақстандағы 27 театрдың ішінен біздің театр мен Қарағандыдағы Сәкен Сейфуллин атындағы театр ұжымы шақырту алдық. Оның өзі біз үшін — үлкен абырой, үлкен жеңіс,- дейді Абай атындағы музыкалық драма театры директорының орынбасары Естай Шәріпұлы.
«Ричард III» қойылымы «Дариға-ай» жастар театрының сахнасында 2017 жылдан бері қойылып келеді. Спектакль бұған дейін елімізде өткен байқауда Гран-при алып, Татарстанның Қазан қаласындағы фестивальда лауреат атанған.
— Түркі тілдес бауырларымыз қойылымды жоғары бағалады. Жасыратыны жоқ, қойылымдардың көпшілігінде сөз көп. Бізде қанға басын малу, қылышпен ұру деген секілді арнайы эффектілер көп. «Мынадай эффектілерді кинодан ғана көруші едік. Сахнадан көрген бір бөлек екен»,- деп көрермендер ерекше бағасын берді. Бір қызығы, біз қойылым қойған театрдың Ричардқа қатысы бар екен. 120 жылдық тарихы бар театр тастан тұрғызылған. Осы тұста тағы бір дүниені айтпасқа болмайды. Түркиядағы елшінің кеңесшісі болып жұмыс істейтін семейлік Мерей Саятұлы деген бауырымыз бізге «Семейден арнайы келді» деп айрықша құрмет көрсетті. Анкарадан қарсы алып, үлкен шаһарды аралатып, дастарқанын жайып, қазақтың қонақжайлығын танытты. 270 шақырымды артқа тастап, Коньяға арнайы кеп спектаклімізді тамашалады. Қысқасы, Түркия жерінен ерекше әсермен, ғажап көңіл-күймен оралдық,- дейді Естай Шәріпұлы.
