Облыс әкімі Нұрлан Ұранхаев қаладағы саяжайларда орын алған түйткілді мәселелер бойынша жиын өткізді.
Айкөркем МАҚЫШ,
«Semeı tańy»
«Мұрат», » Бобровка» саяжайларын электр жарығынан ажырату фактісі бойынша тұрғындардан келіп түскен арыз шағым негізінде кешенді тексеру жүргізуге облыс әкімі тарапынан тапсырма берілген болатын. Тексеру барысында табиғи монополияларды реттеу қызметінің талаптарына қайшы келетін фактілер анықталды. Нақты айтқанда, «Семей Мұрат Доверие» және «Бобровка» бақша өсірушілер кооперативі тарапынан заң бұзушылық орын алған. Бұл — әкімшілік айыппұл салуға негіз болатын жағдай.
Алайда облыс әкімі Нұрлан Ұранхаев екі жақты да өзара түсіністікке шақырып, саяжай тұрғындарының электр энергиясынан ажыратылмауын тапсыра отырып, олардың тарапынан да заң талаптары сақталуы керектігін ескертті.
Екі айдың ішінде аталған мәселе бойынша қорытынды шығарылады.
Айта кетерлігі, мамыр айының басында «Бобровка» және «Мұрат» саяжайларының мәселелерін шешу үшін жол картасы әзірленген болатын.
Құжатта облыс және қала басшылығымен кездесулерде тұрғындардың өздері айтқан негізгі мәселелер көрсетілген. Қазіргі уақытта Жол картасына сәйкес жұмыстар жүргізіліп жатыр.
Міне, енді Жол картасына сәйкес жұмыстардың алдын ала нәтижелерін талқылау үшін аталған саяжай тұрғындары облыс әкімі Нұрлан Ұранхаевпен кездесіп отыр.
Облыс әкімінің орынбасары Димитрий Гариковтің айтуынша, кешенді тексеру жұмыстары жүргізіліп жатыр. Сол тексерулердің нәтижелері бойынша уәкілетті органдармен процессуалдық іс-әрекеттер қабылданады.
Жиын соңында облыс әкімі осы мәселелерді
10 шілдеге дейін шешуді тапсырды.
