Биыл Қазақстандағы тұңғыш педагогикалық оқу орны – М.Әуезов атындағы педагогикалық колледждің құрылғанына 120 жыл. Мерейтой қарсаңында облыс әкімінің қолдауымен оқу орнының жанынан жаңа ғимараттың құрылысы басталды.
Ғимараттың іргетасын құю рәсіміне Абай облысының әкімі Нұрлан Ұранхаев, ардагер ұстаз, оқу орнының түлегі, еңбек ардагері Р.Каштеков қатысты. Колледж директоры Шағангүл Жанаева құттықтау сөз сөйлеп, облыс әкіміне алғыс білдірді.
— Облыс әкімі Нұрлан Телманұлының бастамасымен қасиетті оқу орнымыздың алаңында жаңа ғимарат бой көтермекші. Бұл жаңа ғимарат колледжімізде даярланып жатқан болашақ мамандардың кәсіби шыңдалуына, жан-жақты дамуына ықпал ететін мәдени орталық болады деп есептеймін. Өзіміздегі 100 орындық мәжіліс залы әр түрлі деңгейдегі іс-шараларды өткізуге тарлық ететін. Ұстаз білімді, жан-жақты дамыған, ата-аналармен жұмыс істей алатын, қоғамды ілгері бастап жүретін белсенді тұлға болуы керек,- деді колледж директоры.
Жобада колледждің оқу корпусы мен жатақханасына жалғасатын концерт залын салу қарастырылған. 2 қабатты етіп жобаланған акт залында ішінара жертөлесі мен ғимарат шатырында салқын кеңістік болады. Бірінші қабатта жуынатын бөлмелер, киім ауыстыратын бөлмелер, музыкалық аспаптар мен реквизиттер қоймалары орналасады.
Екінші қабатта хореография және вокал залдары, оқу кабинеттері және басқа да кабинеттерді орналастыру жоспарлануда.
Жертөледе кір жуатын бөлме, техникалық және желілерді басқару блоктары болады.
Ғимараттың іргетасын құю рәсімі Абай облысының әкімі Нұрлан Тельманұлына және ардагер ұстаз Райхан Райысұлына ұсынылды.
Құрылыс жұмыстары 2024 жылы аяқталады деп болжануда.
Колледж оқытушылары мен студенттері жаңа концерт залының іргетасының қалану сәтіне куә болғандарын қуанышпен жеткізді.
— Білім ордасында ерекше дизайндағы ғимараттың іргетасы қалануда. Бұл тарихи сәтке куә болғанымызға қуаныштымыз. Концерт залының салынуы Қазақстандағы тұңғыш педагогикалық оқу орны – Мұхтар Омарханұлы Әуезов атындағы педагогикалық колледждің 120 жылдық мерейтойына ерекше тарту болды. Облыс әкімінің бұл тартуы біз үшін өте маңызды. Келер жылы жаңа концерт залының ғимаратында игі іс-шаралардың, түрлі байқаулардың жоғары деңгейде өтетініне сенімдіміз,- дейді колледж студенттері.
Айта кетейік, нысан құрылысының демеушісі — Абай облысының әкімдігі мен «Қаражыра» акционерлік қоғамы.
Абай облысы білім басқармасының баспасөз қызметі
