Үржар ауданында Абай облысы Қоғамдық даму басқармасының «Абай Жастары» жастар ресурстық орталығының ұйымдастыруымен «Аяулы жас келін – 2023» байқауы өтті.
Әйгерім СӘРСЕНҚАЛИ,
«Semeı tańy»
Байқауда аймағымыздағы қала және аудандардан ибалы да инабатты 8 келін қатысты, әрбірі үш кезең бойынша сынға түсіп, бақтарын сынады. Семей қаласының келіндері атынан Ақерке Айтқазина, Абай ауданынан Еркежан Арнақызы, Ақсуат ауданынан Эльмира Болатбекова, Аягөз ауданынан Еркежан Вадинова, Бородулиха ауданынан Мәдина Тулеутаева, Бесқарағай ауданынан Раушан Сәбиева, Жарма ауданынан Диана Ғалымбекова, Үржар ауданынан Шынар Конаева қатысты.
Үш кезең бойынша ұйымдастырылған байқаудың «Ас — адамның арқауы» атты алғашқы кезеңінде әр қатысушы ұмытылып бара жатқан ұлттық тағамның бір түрін әзірлеп әкеліп, қазылар алқасына ұсынып, оның тарихын, дайындалу жолдарын түсіндірді. Одан соң келіндер бауырсақ пісіріп, самаурынға шай қойды. Дастарқан жайып, қонақ күту әдебін көрсетті.
Екінші кезеңде байқауға қатысушылар «Жас келіннің бір күні» тақырыбындағы бейнематериалдарын ұсынып, өздерінің бір күндік тыныс-тіршілігін көрсетті.
Ал үшінші, шығармашылық кезеңде жас келіндер өзіндерін таныстырып, халқымыздың салт-дәстүрі, әдет-ғұрыптары жайлы сұрақтарға жауап берді, ән айтып, би билеп, өз өнерлерін ортаға салды.
Байқау нәтижесі бойынша Аягөз ауданынан қатысқан Еркежан Жансерікқызы бірінші орынды, Үржар ауданынан қатысқан Шынар Бақтығажықызы екінші орынды, Абай ауданынан қатысқан Еркежан Арнақызы үшінші орынды иеленді.
Қазақ халқында келіннің отбасындағы рөлі мен орны ерекше. «Келіні жақсы үйдің керегесі алтын» дейді ата-бабаларымыз. Ұлын ұяға қондырып, шаңыраққа келін түсіру – әрбір ата-ананың асыл арманы. Осы ретте ұлттық салт-дәстүрімізді дәріптеп, жас келіндерді шаңырақтың берекесін арттыруға, үлкенге ізет, кішіге құрмет көрсетуге тәрбиелеу мақсатын көздейтін осындай байқаулардың маңызы зор.
