14 шілде күні Абай облысының орталығы Семей қаласындағы Арбат алаңында «AMANAT» партиясы жанындағы «Жастар Рухы» Жастар Қанаты Абай облыстық филиалы мен «Абай жастары» жастар ресурстық орталығының бірлесіп ұйымдастыруымен «Жастарға жұмыс» бос жұмыс орындар жәрмеңкесі өтті.
Шараға Абай облысының кәсіпкерлік және индустриалды-инновациялық даму басқармасы, Абай облысы Семей қаласы әкімдігінің халықты жұмыспен қамту орталығы өкілдері, «AMANAT» партиясы фракциясының облыстық, қалалық мәслихат депутаттары, кәсіпкерлер, жұмыс іздеушілер мен БАҚ өкілдері қатысты.
«AMANAT» партиясының «ХАЛЫҚПЕН БІРГЕ!» сайлауалды бағдарламасы аясында 2027 жылға дейін 1,5 миллионнан астам жасты жұмыспен қамту міндеті қарастырылған. Осы орайда «Жастар Рухы» Жастар қанатымен 6 бағыттан тұратын «Жастарға жұмыс» жобасы іске қосылды
Қазіргі таңда республика бойынша барлығы 3458 ұйым жәрмеңкеге қатысып, 5461 адам жұмысқа орналасуға жолданды, сонымен қатар 18 640 адам мемлекеттік бағдарламалар мен қолдаулар бойынша кеңес алды.
«AMANAT» партиясы жанындағы «Жастар Рухы» Жастар Қанаты Абай облыстық филиал консультанты Қуат Тұрсынғалиев жәрмеңке өткізудің басты мақсатына тоқталды. Бұл – жастарды жұмыспен қамтуға, оқу орын түлектерін жұмысқа орналастыруға жәрдемдесу, жұмыс іздеп жүрген азаматтарды ұсынылатын бос жұмыс орындарының тізімімен таныстыру.
«AMANAT» партиясының «Жастарға жұмыс» жобасының негізінде бос жұмыс орындар жәрмеңкесі еліміздің 20-дан астам аймағында ұйымдастырылуда. Бүгін біз облысымызда да бос жұмыс орындары жәрменкесінің кезекті легін өткізіп отырмыз. Бұл жәрмеңкеге аймағымыздағы отыздан астам кәсіпкерлер, компаниялар келіп, жұмыс іздеушілерге жұмыс орындарын ұсынуда. Облысымыздағы жұмыссыз жастар жұмысқа орналасуға мүмкіншілік алуда», — деді Қуат Болатұлы.
Жәрмеңке барысында жұмыс іздеушілерге еңбек нарығы туралы түсіндіріліп, қызметкерлерге мұқтаж кәсіпорындар жұмысқа орналасу мүмкіндіктері туралы барынша толық ақпарат беріп өтті.
«Қаламызда өтіп жатқан мұндай шаралар арқылы бос жұмыс орындарын тауып, жұмысқа орналасу және мемлекеттік қолдау шараларына қатысуға мүмкіндік алудамыз. Сол себепті бос жұмыс орындар жәрмеңкесі жұмыссыз жастарға арналған таптырмас іс-шара дегім келеді. Екі қолға бір күрек іздеп жүрген жастарды бұл шараға келіп, өз мүмкіндіктерін жіберіп алмауға шақырамын», — деді қала тұрғыны.
Ұйымдастырушылар жалпы облыс бойынша жыл көлемінде аталған жәрмеңкелер жүргізілетінін, сондай-ақ жылжымалы бос жұмыс орындар жәрмеңкелері де өтетінін хабарлайды.
«AMANAT» партиясының Абай облыстық филиал баспасөз қызметі
