Әлеуметтік медициналық сақтандыру қорының басқарма төрағасы Сәбит Ахметов Абай облысына жұмыс сапарымен келді.
Сәбит Ахметов облысымызда іссапармен жүрген ҚР Парламенті Мәжілісінің депутаты Нұртай Сабильяновпен және Абай облысы Денсаулық сақтау басқармасының басшысы Марат Сандыбаевпен бірге бірқатар медициналық ұйымдарды аралады. ӘМС қорының басқарма басшысы Семей қаласындағы №7 емханада, Жедел медициналық жәрдем ауруханасында, жедел жәрдем станциясында, Облыстық перинаталдық орталықта және Бородулиха аудандық ауруханасында болды. Сонымен қатар облыстың медицина қауымдастығымен кездесіп, түйткілді мәселелерді талқылады.
Бұл — Медициналық сақтандыру қоры басшысының өңірлерге жасаған алтыншы жұмыс сапары. Сапардың басты мақсаты — жергілікті жерлердегі нақты жағдайды көзбен көру және медициналық ұйымдар тәжірибесінде кездесетін барлық мәселелерді барынша ескеру. Биылғы жылдың 3-ші тоқсанының соңына дейін барлық өңірлермен танысу жоспарлануда.
— Менің ойымша, мұндай сапарлар мен кездесулер өте маңызды. Абай облысында жақсы техникалық жарақтандыру, кадрлармен қамтамасыз етудің айтарлықтай жоғары пайызы, мықты мамандар базасы, мамандандырылған медициналық көмектің жоғары деңгейі байқалады. Иә, медицина қызметкерлерінің тәжірибесінде кездесетін проблемалық мәселелер де жоқ емес, біз оларды өзімізге жазып алдық және оларды шешу жолында жұмыс істейтін боламыз, – деп атап өтті Сәбит Ахметов медицина қауымдастығымен кездесуде.
Кездесу барысында қаржыландыру, тарифтерді көтеру, клиникалық-шығынды топтар бойынша қаржыландыру әдісін қайта қарау, жарақтандыру, клиникалық хаттамаларды қайта қарау, сонымен қатар медицина қызметкерлерінің жалақысының өсуіне орай еңбекақы төлеу қорына жүктеменің артуына байланысты туындайтын мәселелер жайында айтылды.
— Қаржыландыру және тарифтерді көтеру мәселелері егжей-тегжейлі пысықтауды, оның ішінде уәкілетті органмен талқылауды және заңнамалық деңгейдегі өзгерістерді талап етеді. Біз МӘМС бойынша тарифтерді алып, бірден көтере алмаймыз, өйткені ол кезде ТМККК бойынша тарифтерді де көтеруіміз керек болады. Ал бұл — республикалық бюджет. Қазір біздің басты міндетіміз — ТМККК және МӘМС пакеттерін нақты бөлу. Біз бұл мәселені шешкен кезде қаржыландыру бөлігіндегі мәселелер де шешіледі деп ойлаймын. Дегенмен біз өз тарапымыздан барлық сұрақтарды жинадық, міндетті түрде ұсыныстарды тұжырымдап, әрі қарай жұмыс істеу үшін денсаулық сақтау министрлігіне тапсырамыз, — деді қор басшысы.
2023 жылы облыстың медициналық ұйымын қаржыландыру шамамен 10 млрд теңгеге өсті: өткен жылы – 70,1 млрд теңге, биыл — 80,2 млрд теңге.
Нұртай Сабильянов өз кезегінде Сәбит Ахметовке аймаққа келгені үшін алғысын білдіріп, өз тарапынан айтылған мәселелерді шешуде бар күш-жігерін салуға дайын екенін атап өтті.
— Осы күндері біз Семей қаласының 4 медициналық ұйымына барып, олардың жетістіктері мен проблемаларымен жеке таныстық. Енді біз әрбір мәселені өз құзыретіміз шеңберінде шешуіміз керек, атап айтқанда Үкімет пен Денсаулық сақтау министрлігінің нормативтік құқықтық актілеріне, бұйрықтары мен ережелеріне өзгерістер енгізу қажет. Сондай-ақ «МӘМС туралы» Заңға және Халық денсаулығы туралы кодекске өзгерістер енгізуді әзірлеу қажет деп ойлаймын. Біз қазір барлық проблеманы бірден шешеміз деп айта алмаймыз. Бірақ Денсаулық сақтау басқармасымен және Медициналық сақтандыру қорымен бірлесіп жұмыс істесек, бұл мүмкін деп ойлаймын. Проблемаларды шешу үшін біз бірігуіміз керек, — деп атап өтті Н.Сабильянов.
Депутат сонымен қатар МӘМС жүйесінде мәртебесінің болмауына байланысты шалғай аудандардың тұрғындарына медициналық көмектің қолжетімсіздігі туралы проблеманы көтерді.
Әлеуметтік медициналық
сақтандыру қорының баспасөз
қызметі
