18 шілде күні Семей қаласының кәсіпкерлік бөлімі, полиция басқармасы, санитариялық-эпидемиологиялық бақылау басқармасының ұйымдастырумен Чехов көшесі бойындағы жабайы сауда орындарына рейд жүргізілді.
Жадыра ТӨЛЕГЕНҚЫЗЫ,
«Semeı tańy»
Рейдке шыққан топ Чехов көшесінің екі жағымен де жүріп өтіп, сатушылармен жеке-жеке тілдесіп, жаяу жүргіншілер жолына тауар қоюға тыйым салынғанын және тауарлар дүңгіршектің ішінде ғана сатылуы тиіс екенін еске салды. Сатушылардың кейбірі құқық қорғау органдары өкілдерінің ескертуіне бірден құлақ асса, кейбірі «өзгелер кірсе, мен де кіремін» деген жауаптар қайтарды. Олар әкімдік 1 тамызға дейін сауданы жалғастыруға рұқсат бергенін айтады.
— Біз заңнама аясында профилактикалық бақылауды тағайындау туралы акт болған жағдайда ғана тексерулер жүргізе аламыз. Яғни актісіз ешкімді тікелей тексере алмаймыз. Дегенмен жабайы сауданың халық денсаулығына үлкен қауіп төндіретінін түсіну керек. Өйткені далада сатылатын ет, балық, сүт өнімдерінің сақталу шарттары санитарлық ережеге мүлде сай емес,- деді Семей қаласының санитариялық-эпидемиологиялық бақылау басқармасының басшысы Айдар Әлменов.
Рейдке шыққан топ көшеде сауда жасап отырғандарды «Ақшың», «Мереке», «Арғымақ» сынды жабық сауда орындарын жалдауға шақырды. Өз кезегінде, сатушылар оларда жалдау бағасының екі есе қымбат екенін алға тартты. Қалай болғанда да, 1 тамыздан бастап бейберекет саудаға рұқсат берілмейтінін барлығы біледі екен.
— Менің бұл орынды жалға алып отырғаныма 23 жыл болды. Нәпақамды тауып жүрмін. Енді қайда барамыз? Зейнет жасына әлі ерте. Зауыт-фабрикалар істеп тұрған жоқ. Бұйырғанын көреміз енді,- дейді сатушылардың бірі — Нұргүл Кәкішева есімді қала тұрғыны.
Заңға бағынбаған сатушыларға, ҚР ӘҚБтК-нің «Белгіленбеген орындарда сауда жасау» туралы 204-бабының 1-бөлігі бойынша, 5 АЕК мөлшерінде айыппұл салынуы тиіс. Бірақ бұл жолы да жергілікті полиция ескертумен шектелді.
— Біз бүгін сонымен қатар коммуналдық қалдықтардың шығарылмағанына да куә болып отырмыз. ҚР ӘҚБтК-нің «Қалалар мен елдi мекендердiң аумақтарын абаттандыру қағидаларын бұзу» туралы 505-бабы бойынша, қазір полиция қызметкерлері жұмыс істеуде. Жалпы, жыл басынан бері аталған заң ясында 500-600 хаттама толтырылып, тиісті айыппұлдар салынды. Бүгінгі рейдтің қорытындысы туралы алда хабарлайтын боламыз,- дейді Семей қаласы жергілікті полиция қызметі бастығының орынбасары полковник Виталий Таиров.
