Өткен аптада Семей қаласының әкімі Нұрбол Нұрсағатов Шаған кенті мен Жиенәлі, Достық ауылдық округтеріне жұмыс сапарымен барды. Бұл туралы Семей қаласы әкімдігінің баспасөз қызметі хабарлады.
Жадыра ТӨЛЕГЕНҚЫЗЫ,
«Semeı tańy»
Өткен аптада қала әкімі Нұрбол Нұрсағатов жаз маусымында атқарылып жатқан жұмыстардың барысымен танысу үшін Шаған, Жиенәлі, Достық ауылына барып, тұрғындармен кездесті.
Қазіргі таңда ауылдық округтерде атқарылып жатқан жұмыстар аз емес.
Шаһар басшысы ең алдымен Шаған кентіне барды, кенттегі ең өзекті мәселе — жайылымдық жерлердің тапшылығы. Осы мәселені шешу үшін Семей қаласының әкімдігі бос жатқан жерлерді тұрғындардың иелігіне беруде. Шаған кентіне шамамен 11,2 мың гектар жайлымдық жер жетіспегендіктен, Жиенәлі ауылдық округінің Дегелең учаскесінен 5,0 мың гектар жайылымдық жер пайдалануға берілді. Сонымен қатар елді мекенге тиесілі жер ретінде жолдың оң жағындағы шамамен 300 гектар жер Бесқарағай ауданының резервінен қосылады.
Шаған кентіндегі жұмыс сапарынан кейін Нұрбол Нұрсағатов Жиенәлі ауылдық округіндегі Бөкенші ауылына барып, ауылдық әкімдік ғимаратында ауыл тұрғындарымен кездесті. Биыл Бөкенші ауылының шетінде қар тоқтататын қоршау орнатылып жатыр. Сонымен қатар Бөкенші ауылының орталық көшесінде ауыл тұрғындарының спортпен шұғылдануы үшін тренажер воркауты қолданысқа беріледі. Қазіргі таңда воркаут алаңынын құрылысы аяқталуға жақын.
Округ орталығындағы Орталық саябаққа жазғы маусымға көше сахнасы орнатылатын болады. Қазіргі уақытта сахнаның сыртқы әрлеуіне керекті құрылыс материалдары сатылып алынуда. Сонымен қатар Бөкенші және Маралды ауылдарының жыл бойғы санитарлық тазалығын қамтамасыз етуге қалалық бюджеттен 3 млн теңге қаржы қарастырылды. Қазіргі таңда ауыл сыртындағы құрылыс қалдықтары тазартылған.
Келесі кезекте қала басшысы Достық ауылдық округінің орталығы Шақаман ауылына барды. Мұнда футбол алаңының құрылысы аяқталып, жарықтандыру бағандары орнатылған.
Биыл сонымен қатар «Гранд Семей» ЖШС әкім аппаратының ғимаратында өрт дабылын орнатты.
Өткен жылы Шақаман мен Достық ауылдарында балалар алаңқайы салынған болатын. Бірақ тиісті жұмыстар толығымен ақталмады. Осы олқылықтарды жою үшін биылғы мамыр айында түрлі архитектуралық нысандар орнатуға қаражат бөлінді, бүгінде олар саябақтарға орнатылып жатыр.
Шақаман ауылында 2021 жылдан бері шешімін таппай келе жатқан ең өзекті мәселе — су құбырын тарту жұмыстары аяқталмаған. Мердігер ұйым келісімшартта көрсетілген жұмыстарды толық орындамағандықтан, Абай облысының мамандандырылған ауданаралық экономикалық сотына су құбыры желілерінің құрылысын аяқсыз қалдырған “QazConstructions» ЖШС-на шартты бұзу және тұрақсыздық айыбын өндіріп алу туралы талап арыз жолданды.
