ҚР Премьер-Министрі Әлихан Смайыловтың төрағалығымен өткен Үкімет отырысында егін жинау науқанына дайындық және жемшөппен қамтамасыз ету, сондай-ақ алдағы жылу беру маусымына дайындық бойынша өзекті мәселелер қаралды.
Ауыл шаруашылығы министрі Ербол Қарашөкеев биылғы қолайлы жағдай егін орағын уақтылы бастауға мүмкіндік бергенін атап өтті. Бүгінгі күні республика бойынша барлығы 2,4 млн гектар немесе 14,1 пайыз дәнді және дәнді-бұршақты дақылдар жиналды. Орташа түсім гектарына 11,5 центнер болып, 2,8 млн тонна астық бастырылды.
Биыл ауыл шаруашылығы дақылдарының жалпы жиналатын алқабы 24 млн гектарды құрайды.
Егіс науқаны сапалы тұқымдарды пайдалану арқылы оңтайлы мерзімде жүргізілді. Диқандар тыңайтқыштарды дер кезінде беріп, егінді арамшөптер мен ауруларға қарсы химиялық өңдеу жұмыстарын уақтылы жүргізді.
Сонымен қатар вегетациялық кезеңде диқандар құрғақшылық пен егістік суының жетіспеушілігіне байланысты бірқатар қиындықтарға тап болды, бұл егістіктің жағдайына әсер етті. Осы ретте өңірлік ауқымды төтенше жағдай жариялау және шаруалардың шығындарын жабу, субсидияларды жеделдетіп төлеу және несие мерзімін ұзарту жұмыстары жүргізіліп келеді.
Премьер-Министр егінді уақытында және сапалы жинап алу – еліміздің азық-түлік қауіпсіздігін қамтамасыз ету жөніндегі басым міндеттердің бірі екенін атап өтті.
«Бірқатар өңірлерде егін орағы басталып кетті. Үкімет тарапынан қаржылық және материалдық-техникалық қамтамасыз ету бойынша барлық қажетті шаралар қабылданды», — деді Әлихан Смайылов.
Мәселен, нарықтық бағадан 15 пайызға төмен бағамен (250 теңге/литр) 426 мың тонна дизель отыны бөлінді. 140 млрд теңге бюджеттік несие беру көзделген. Сондай-ақ жаңа астықты форвардтық сатып алуға 81 млрд теңге бөлінді. Биыл мал азығын дайындауға арналған техника мен суару жүйелерін сатып алу үшін «ҚазАгроҚаржы» компаниясының жарғылық капиталын ұлғайтуға 20 млрд теңге бөлінді.
«Өздеріңіз білетіндей, жаз айлары жылдағыдан ыстық болды. Құрғақшылықтан бірқатар өңірлер зардап шекті. Оларда жиналатын өнім көлемі азайып қалайын деп тұр. Құрғақшылықтың салдарын жою мақсатында шұғыл шаралар қабылданды. Оның ішінде Үкімет резервінен қаражат бөлінетін болады», — деп атап өтті Премьер-Министр.
Бұл ретте «Бәйтерек» холдингіне құрғақшылықтан зардап шеккен шаруалардың несиелері бойынша борыштарды төлеу мерзімін ұзарту және оны қайта құрылымдау мәселесін пысықтау тапсырылды.
«Жеткілікті көлемде өнім жиналады. Қазақстандықтар нансыз қалмайды», — деп атап өтті Әлихан Смайылов.
Сонымен қатар ол климаттың өзгеруі мен су тапшылығы ауыл шаруашылығы үшін үлкен қауіп-қатерге айналып отырғанын айтты. Сондықтан Су ресурстарын тиімді пайдалануды күшейту бойынша жол картасын әзірлеу, ал өңірлерге белсенді түрде су үнемдеу технологияларын енгізу талап етіледі. Премьер-Министр жемшөп дайындауға ерекше назар аударуды тапсырды.
Қорытындылай келе, Үкімет басшысы астықты дер кезінде тасымалдап, сақтау орындарын дайындау бойынша жұмысты уақтылы жүргізу, сондай-ақ тұрақты бағаны сақтай отырып, жемшөп қорын сапалы дайындау бойынша тиісті шаралар қабылдау қажеттігін атап өтті.
Үкімет отырысында алдағы жылу беру маусымына дайындық мәселесі де талқыланды. Премьер-Министр Әлихан Смайылов өңірлік коммуналдық қызметтер мен жылу орталықтарының іс-қимылының әр қадамы жазылған алгоритм бекітілуі тиіс екенін айтты.
«Жалпы, жылыту маусымына дайындық және оны өткізу барысы – күнделікті маңызды мәселе. Сондықтан әрбір өңірде жол картасын әзірлеп, бекіту қажет. Онда жылу желілерін дамытуды, жаңа жылу орталықтарын салу мен қолданыстағы орталықтарды күрделі жөндеу жұмыстарын нақты айқындау керек. Сондай-ақ авариялар болған жағдайда өңірлік коммуналдық қызметтер мен жылу орталықтарының іс-қимылының әр қадамы жазылған алгоритм бекітілуі тиіс», — деді Ә. Смайылов Үкімет отырысында.
Оның айтуынша, осы сектордағы цифрландыру мен автоматтандыру деңгейін арттыру маңызды.
«Жылу желісі инфрақұрылымының жай-күйі, шығын деңгейі, тұтынатын жылу энергиясының қуаты мен сапасы туралы объективті деректер қажет. Бұл жылу жүйесін басқаруға және жылу беретін объектілердегі авариялар санын азайтуға мүмкіндік береді», — деді Премьер-Министр.
Үкімет басшысы өңір әкімдіктері белгіленген мерзімде барлық жоспарланған жөндеу жұмыстарының аяқталуын және қажет көлемде отынның алдын ала жеткізілуін қамтамасыз етуді тапсырды.
Ішкі көмір нарығында дүрбелеңге жол бермеу үшін өңір әкімдіктері тиісті тәртіппен 2 апта мерзімде көмірді дайындау және өткізу пункттерінің жағдайына, оның сапасына, жеткізу кестелеріне, баға деңгейіне тексеру жүргізуі қажет. Индустрия министрлігі «Қазақстан Темір Жолымен» бірлесіп, көмір жеткізу үшін вагондардың қажетті санын қамтамасыз етуі тиіс. Өңірлерде жеткізілген отын үшін кәсіпорындардың, сондай-ақ коммуналдық қызметтер үшін тұтынушылардың дебиторлық берешегін өтеу жұмыстарын күшейту керек», — деді Премьер-Министр.
primeminister.kz сайты ақпараты бойынша әзірленді
