Семейде тұрғындарға жайлы және қолайлы өмір сүру ортасын қалыптастыру мақсатында жүргізіліп жатқан жұмыстар қала әкімі Нұрбол Нұрсағатовтың қатаң бақылауында.
Шаһар басшысы күн сайын құрылыс және жөндеу жүргізіліп жатқан аумақтарда болып, жұмыс барысын қадағалауда. Апта басында шаһар басшысы облыстық тұрғын үй-коммуналдық шаруашылығы басқармасының басшысы Серік Төленбергеновпен жылу қазандықтарын аралады.
Нұрбол Нұрсағатов «Орталық» және «Ғаббасов» қазандықтарын аралап, жылу желісін жөндеу жұмыстарының барысымен танысты. Сондай-ақ ЦТП-9, «Орталық», ЦТП-518, ЦТП-457, ЦТП-401 учаскелерін, Би-Боранбай көшесінен Физкультурная көшесіне дейінгі жылу магистралын, ЖЭО-1-ден П-1-ге дейінгі жылу желісіндегі жұмыстарды тексерді.
Өткен жылы жылу құбырларында апаттық жағдайлар орын алғаны белгілі. Жоспар бойынша ағымдағы жөндеу жұмыстары нәтижесінде жылу желілеріндегі апаттар 15 пайызға азаяды.
Шаһар басшысын сонымен қатар аула аумақтарындағы абаттандыру жұмыстарының уақытында аяқталуын да назарында ұстап отыр. Нұрбол Нұрсағатов мердігер ұйымдардың басшыларымен бірге Аймауытов көшесіндегі №180, Шәкәрім көшесіндегі №86, Глинка көшесіндегі №30-32, Қостанай көшесіндегі №1 «Б», Би Боранбай көшесіндегі №45 «А», Түріксіб көшесіндегі №51-53 үйлердің аулаларындағы жүріп жатқан жұмыстарды да тексерді.
— Аула аумақтарын абаттандырумен қатар, тазалық шараларын да қатаң қадағалау керек. Ең алдымен балалардың қауіпсіздігін қамтамасыз ету керек,- деді қала әкімі Нұрбол Нұрсағатов.
Еске сала кетсек, биыл 70-ке жуық аула аумақтарын абаттандыру жұмыстары көзделген. Биыл Семейде бірнеше тұрғын үйдің аулаларында құрылыс жұмыстары бекітілген кестеге сәйкес жүргізіліп, футбол алаңдары мен қоршаулар орнатылды. Жақын уақытта тағы бірнеше аула тұрғындардың игілігіне берілетін болады.
Өз тілшіміз
