Абай облысы әкімінің орынбасары Димитрий Гариков жолаушылар көлігі және автомобиль жолдары басқармасының, «Integra Construction KZ» ЖШС мердігер ұйымының және техникалық қадағалауды жүзеге асыратын «T.A.S. Build» ЖШС өкілдерімен көшпелі жиын өткізді. Бұл туралы Абай облысының әкімдігі хабарлады.
Димитрий Гариков жауапты мамандармен бірге автокөпірді қайта жаңғырту жұмыстарының барысымен танысып, жұмыс қарқынын арттыруды тапсырды.
Бүгінде жаңадан салынып жатқан көпірдің оң жағалауында құрылыс алаңы дайындалып, №2 күзет пунктінің құрылысы жүргізілді, кәріз желілері алып тасталынды. Ал сол жағалауда кабель желілері көшірілді, №1 тірегінің (қаңылтырдың қорғаныш қабырғасы суға орнатылды, арматуралау, бетондау және гидрооқшаулау жұмыстары жүргізілді), №2 тірегінің (шұңқыр әзірленді, бетон қабаты құйылды, шұңқырды гидрооқшаулау және толтыру аяқталды), №6 және №8 тіректердің құрылысы жүргізіліп жатыр.
Осы жылдың аяғына дейін №2, №3, №6, №8 тіректерін орнату жоспарланған.
Еске салсақ, жаңа көпірдің жалпы ұзындығы 1,3 шақырым, ені 23 метр болады. Көпір 9 тіректі, 8 бағаналы, төрт жолақты болады деп жоспарланған. Бір қозғалыс жолағы 3,75 метрді құрайды. Ескі автокөпір толығымен жаяу жүргіншілерге арналған көпір болады.
«ST» — ақпарат
