Қала әкімі Нұрбол Нұрсағатов ландшафт дизайнері, сәулетші Роман Шнайдерманмен бірге Жамақаев және Мәңгілік ел көшелеріндегі қоғамдық орындардағы құрылысты тексерді.
Роман Шнайдерман — әйгілі ландшафт сәулетшісі. Ол Астана, Алматы, Атырау, Ақтөбе, Ақтау, Павлодар, Шымкент, Тараз және еліміздің басқа да қалаларында абаттандыру жобаларын әзірлеген. Алматыдағы Панфилов көшесіндегі жаяу жүргіншілерге арналған аймақты, Астанадағы ботаникалық бақты, сондай-ақ Түркістан қаласының жаңартылған орталығын абаттандырған.
Қазіргі таңда Семей қаласындағы Жамақаев және Мәңгілік ел көшелеріндегі қоғамдық орындарды абаттандыру жобасын жүзеге асыруда. Айта кетерлігі, Р.Шнайдерман бұл қоғамдық орындардың дизайнын тегін жобалаған.
Қала әкімі Нұрбол Нұрсағатов сәулетшімен бірге аталған көшелердің бойындағы қоғамдық орындарды көгалдандыру, тұрғындарға жайлы демалыс орындарын ұйымдастыру және жаяу жүргіншілердің кедергісіз жүруіне жағдай жасау мәселелерін талқылады.
— Көктемде облыс, қала басшылығының шақыруымен Семей қаласында жұмысқа кірістім. Ең алдымен шаһарды аралап, қоғамдық кеңістіктерді ұйымдастыру тұрғысынан ең тиімді болып табылатын бірнеше нысанды таңдадық. Мәңгілік ел көшесі — қала орталығын жағалаумен байланыстыратын басты көшелердің бірі. Біз мұнда жайлы қаланың барлық заманауи жаһандық тенденцияларын енгізуге тырысамыз. Ойын және спорт алаңдары, велосипед жолдары, қоғамдық тамақтануға арналған фудкорттар, сәнді сәулеттік жарықтандырулар, бұталар мен көп жылдық гүлдерді автоматты суару жүйесі орнатылатын болады, — дейді сәулетші Роман Шнайдерман.
Жоба бойынша, көше бойынан жаяу жүргіншілер аллеясын, балалар және спорт алаңдарын, демалыс орындары мен фудкорт салу қарастырылған.
— Көгалдандыруға ерекше мән бердік. Біздің ойымызша, қалаға жетіспейтін нәрсе — осы. Барлық жобаларды облыс, қала басшылығымен бірнеше рет талқылап, түзетулер енгіздік. Біз бұл жобаға көп күш салдық. Барлық жұмыстар аяқталғаннан кейін бұл Семей қаласының тұрғындары мен қонақтарының серуендеп, демалатын сүйікті орнына айналатынына сенімдімін. Осындай қызықты жобаны жүзеге асыруға мүмкіндік бергені үшін облыс және қала әкіміне алғысымыз шексіз. Тұрғындарға ұнайды деп ойлаймын, — дейді Роман Шнайдерман.
Еске салайық, қазір Семейде оннан астам қоғамдық орындар абаттандырылуда.
Семей қаласының әкімдігі
