Семейде Чехов, Найманбаев, Аймауытов және Уәлиханов көшелерінің жолдарын орташа жөндеу жұмыстары басталды. Ал Қарағайлы ықшам ауданында нефрология орталығы мен мектеп құрылысы жүргізілуде. Шығыс кентінде де осындай жұмыстар қолға алынды.
Жадыра ТӨЛЕГЕНҚЫЗЫ,
«Semeı tańy»
Биыл облыс орталығында жалпы ұзындығы 60 шақырым болатын 40 көшеге орташа жөндеу жұмыстарын жүргізу жоспарланған. Қазіргі таңда 30 көшеге асфальт төселді. Жуырда Чехов, Найманбаев, Аймауытов және Уәлиханов көшелерінде, Орталық базар ауданында жол және тротуарларды ағымдағы жөндеу жұмыстары басталды.
Бұдан бұрын қалалық әкімдік мамандары мен жергілікті полиция бөлімінің қызметкерлері Чехов, Аймауытов көшелеріндегі саудагерлерге жолды босату қажет екенін айтып, түсіндірме жұмыстарын жүргізген болатын. Бейсенбі күні қала әкімі Нұрбол Нұрсағатов базар көшелерін аралап, мердігер ұйым басшысына бірқатар тапсырмалар берді.
— Қаншама жылдан бері саудагерлер белгіленбеген орындарда сауда жасап, базар көшелеріндегі тротуарларды жауып тастады. Бұның салдарынан жаяу жүргіншілерге ыңғайсыздық туып, кептелістер орын алды. Заң бәріне ортақ. Саудагерлерге саудамен айналысуға арнайы орындар беріледі. Биыл жол инфрақұрылымын жақсартуға бағытталған ауқымды жобалар жүзеге асырылуда. Қала халқы осыны түсініп, қолдау көрсетулері керек,- деді Нұрбол Нұрсағатов.
Айта кетейік, қалалық әкімдік осы көшеге жақын маңдағы “СМОКК”, “Мереке”, “Нұр”, “Жансая”, “Северный”, “База-R” базарларынан саудагерлерге арнайы орындар берді. Сондай-ақ қала әкімі базар көшелеріне жол белгілерін орнатып, сызықтарын сызуды тапсырды.
— Ағымдағы жылдың басынан бері учаскелік полиция инспекторлары ҚР Әқбтк 204- бабымен қоғамдық орында сауда жасауға қатысты заңсыз сауданың 395 фактісін тоқтатты. Осы баптың санкциясы ескерту жасауға және
5 АЕК көлемінде айыппұл салуға әкеп соғады, — деді жергілікті полиция бөлімінің бастығы Елдос Оразалин
Нұрбол Нұрсағатов сонымен қатар Қарағайлы ықшам ауданына да барды. Онда салынып жатқан нефрология орталығы мен мектептің құрылыс жұмыстарымен танысып, абаттандыру бағытындағы жұмыстардың барысын да тексерді.
Еске сала кетсек, қаланың бас жоспарына сәйкес, оң жағалауда Қарағайлы шағын ауданының егжей-тегжейлі жобалау жоспары әзірленген. Қазіргі таңда шағын ауданда нефрологиялық орталық пен емхана салу мақсатында ауданы 0,4906 гектар жер телімі бөлініп, құрылыс жүргізуге дайындық басталды. Сондай-ақ оқушы орындарының тапшылығын жою мақсатында бұл ауданда 1200 оқушыға арналған мектеп салу жоспарланған болатын, қазір іргетасы қаланып жатыр.
— Қарағайлы ықшам ауданының даму қарқыны өте жоғары. Соңғы жылдары мұнда қоныстанушылардың да саны артты. Мектеп құрылысы келесі жылы жаз маусымында толық аяқталып, қыркүйек айында аудан оқушылары осы мектепке баруы керек. Жұмысты жылдам әрі сапалы аяқтаңыздар. Жер астындағы желілердің сапалы жүргізулеріне көңіл бөліңіздер,- деді Нұрбол Нұрсағатов
Айта кетерлігі, Семей қаласы бойынша үй кезегіне 13 000-нан астам қала тұрғыны тіркелген. Осыған орай, Қарағайлы ықшам ауданында 26 көп қабатты бюджеттік тұрғын үйдің құрылыс жұмыстары жүргізілуде. Жыл соңына дейін мемлекеттік бағдарлама бойынша салынып жатқан 15 көп қабатты тұрғын үйдің (487 пәтер) құрылысын аяқтау жоспарланып отыр.
Шығыс кентінде де ауқымды жобаларды жүзеге асыру көзделген. Атап айтқанда А.Көшкінбаева көшесіне асфальт төселіп, жиек тастары ауыстырылуда. Усть-Каменогорская көшесінен ИТ колледжіне дейінгі жолды орташа жөндеу аяқталды. Сонымен қатар кенттегі мектепке апаратын бірнеше көше жарықтандырылып, қосымша қоқыс контейнерлері орнатылатын болады. Ал Декоративная көшесінде аумағы үлкен қоғамдық кеңістіктің құрылысы жүргізілуде. Құрылыс қазан айына дейін аяқталады деп күтілуде.
Қала басшысы Нұрбол Нұрсағатов кент белсенділерімен кездесу өткізіп, олардың сұрақтарына жауап берді. Жиынға барлық мекеме, бөлім басшылары, құқық қорғау органдарының қызметкерлері қатысты.
Халық алдында есеп берген Нұрбол Төлегенұлы қала тұрғындарын алаңдататын ең өзекті мәселелерге де тоқталды. Ал тұрғындар ТКШ жұмысына, қоғамдық көлікке қатысты шағымдарын айтып, әлеуметтік мәселелерді көтерді.
Қала басшысы көтерілген мәселелердің барлығы да өзекті екенін атап өтіп, бәрі де ретімен жүзеге асатынын, айтылған ұсыныс-пікірлер бойынша хаттама түзілгенін айтты. Атқарылған жұмыстар әлеуметтік желілерде жарияланатын болады.
Биыл Семей қаласының әкімдігі шеткері аудандарды дамытудың іс-шаралар жоспарын бекіткен болатын. Қазіргі таңда шеткері кенттерде 9 қоғамдық кеңістіктің құрылысы жүріп жатыр.
— Қыс маусымында іс-шаралар жоспарын әзірлеп, тұрғындармен келіскен едік. Енді соған сәйкес жұмыс жүргізудеміз,- деді қала әкімі Нұрбол Нұрсағатов.
