Абай облысында 29 тамыз – Семей полигонының жабылу күніне орай «Бейбітшілік акциясы» өтті, деп хабарлайды ҚазАқпарат тілшісі.
Облыс әкімдігінің мәліметіне сүйенсек, акцияға «Невада-Семей» халықаралық антиядролық қозғалысының белсенділері, қоғам қайраткерлері мен жергілікті тұрғындар қатысты. Олар Семейдегі «Өлімнен де күшті» монументіне гүл шоқтарын қойып, ядролық сынақ құрбандарын бір минут үнсіздікпен еске алды.
Абай облысы әкімінің орынбасары Шалқар Байбеков ядролық қарусыздану жер бетіндегі бейбітшілікті сақтау жолындағы маңызды қадам болғандығын атап өтті.
«Отыз екі жыл бұрын бүкіл әлемге бейбіт өмірдің жарқын үлгісін көрсеттік. Қазақстан ядролық арсеналдан, ерікті түрде, бас тартты. Алайда полигон жаңғырығы әлі де халық жадында, тарихи деректе, баспасөз беттерінде ауық-ауық көрініс табады. Саяси-мелитаристік бәсеке жолында, жазықсыз жапа шегіп, құрбан болған жерлестеріміздің асқақ рухы алдында басымды иіп, тағзым етемін!», — деді ол.
Шара аясында халықаралық ядролық қарсы іс-қимыл күніне арналған көрме қойылды. Сондай-ақ бұл күні Абай облысының қалалары мен аудандарында түрлі акция, көрме, конференциялар ұйымдастырылды.
Айта кетейік, Семей полигоны осыдан 32 жыл бұрын, 1991 жылы 29 тамызда жабылды. Осылайша Қазақстан әлемде алғашқылардың бірі болып ядролық қарудан бас тартқан ел болды.
