22-24 қыркүйекте театр маусымы басталды. Өңірімізге белгілі Абай атындағы мемлекеттік қазақ музыкалық драма театры, Достоевский атындағы орыс драма театры және «Дариға-ай» жастар театры күзгі маусымның шымылдығын түріп, өңір халқын тамаша қойылымдарымен қуантбақ.
Жадыра ТӨЛЕГЕНҚЫЗЫ,
«Semeı tańy»
Бұл жөнінде Абай облысының өңірлік коммуникациялар қызметі алаңында аталмыш театрлардың көркемдік жетекшілері баяндады.
Абай атындағы мемлекеттік қазақ музыкалық драма театры жаңа маусымды «Үш бәйтерек» спектаклімен ашпақ. Алдағы уақытта «Қарагөз», «Әйел махаббаты», И.Штраустың «Жарқанат» қойылымдары көрерменге жол тартады.
— Біз биыл театрымыздың күзгі маусымын «Үш бәйтерек» спектаклімен ашқалы отырмыз. Бұл қойылымнан бөлек көрерменге ұсынатын бірнеше өнер туындыларымыз бар. Жерлесіміз, белгілі ақын Тыныштықбек Әбдікәкімұлының шығармашылығынан қойылым қоюды да жоспарлаудамыз, — деді Абай атындағы мемлекеттік қазақ музыкалық драма театрының көркемдік жетекшісінің міндетін атқарушы Әсел Нұрланова.
Театрдың күзгі маусымына дайындық Достоевский атындағы орыс драма театрында да қызу жүріп жатыр. Олар осы маусымда бірнеше кешкі спектакльдер мен ертегілер сахналайды.
— 22-24 қыркүйекте маусым басталып, мәскеулік режиссер О.Плаксин жұмыс істейтін А. Пушкиннің «Евгений Онегин» өлеңіндегі роман бойынша көрсетілім өтеді. Осыдан кейін Көкшетау қаласындағы Халықаралық театр фестиваліне «Мценск уезінің Леди Макбет» спектаклімен бару жоспарлануда. Тағы бірнеше кешкі спектакльдер мен бір ертегі бар, — дейді орыс драмаларының көркемдік жетекшісі, Достоевский атындағы театрдың режиссері Андрей Глушков.
