Семей қаласының Балалар мен жастар шығармашылық сарайында ұстаздар мерекесіне арналған салтанатты жиын өтті. Мерекелік шараға қала әкімі Нұрбол Нұрсағатов, қалалық мәслихат депутаттары, ардагер ұстаздар, жоғары оқу орындарының өкілдері, білім беру ұйымдарының басшылары, педагогтер, үкіметтік емес және қоғамдық ұйымдардың, бұқаралық ақпарат құралдарының өкілдері қатысты.
Алғашқы болып құттықтау сөз алған Семей қаласының әкімі Нұрбол Нұрсағатов ұстаздарға жылы лебізін білдірді.
— Мағжан Жұмабаевтың «Алты алаштың басы қосылса, төр мұғалімдікі» деген ұлағатты сөзі бар. Бұл – ұстазға көрсетілетін жоғары құрмет пен айрықша мәртебенің белгісі.Тұғыры биік еліміздің ертеңі бүгінгісінен де кемел, рухы асқақ, өресі биік болуы ұрпақ тәрбиесінен бастау алады. Баршаңызға ұстаздық деген ұлы жолда аянбай еңбек етіп, қызметтік міндеттеріңізді мінсіз орындауда танытқан кәсіпқойлықтарыңыз үшін алғысымды білдіремін,- деді Нұрбол Нұрсағатов.
Бүгінде облыс орталығында 5870 ұстаз бар. Орта білім беретін мектептерде 4550, мектепке дейінгі ұйымдарда 1163, қосымша білім беру ұйымдарында 157 мұғалім білім көшін алға жетелеп келе жатыр. Қаладағы педагогтердің 42 пайызы жоғары және І, ІІ санатты болса, 46 пайызы жаңа үлгідегі кәсіби біліктілік санатын алған ұстаздар.
Салтанатты кеште қаланың білім беру саласына елеулі үлестерін қосқан үздік педагогтерге марапаттар табысталды.
Оқу-ағарту министрлігінің алғыс хаттарымен «Асыл жібек» шағын орталығының директоры Н.Қуантарова, «Немере» балабақшасының меңгерушісі А.Байболова, «Бақыт» шағын орталығының директоры Т.Әубәкірова, «Ер тан 1» балабақшасының құрылтайшысы Қ.Көндебаев марапатталды.
Өзге де бірқатар ұстаздар Абай облысы әкімінің алғыс хатына, «Қалаға сіңірген еңбегі үшін» төсбелгісіне, Семей қаласы мәслихатының алғыс хатына ие болды.
Салтанатты шара мерекелік бағдарламаға ұласып, білім саласының ардагерлеріне гүл шоқтары тарту етілді.
Сымбат ҚАЙРАТҚЫЗЫ
