Бейсенбі, 12 қазан күні Семей қаласында әнші, Қазақстанның халық әртісі, қазақ академиялық вокалдық педагогикасының тұңғыш профессоры, әлемдік деңгейдегі әншілердің тұтас бір галактикасын өсірген педагог-ұстаз, жерлесіміз Бекен Жылысбаевтың туғанына 100 жыл толуына орай, республикалық вокалистер байқауы басталды.
Сымбат ҚАЙРАТҚЫЗЫ,
«Semeı tańy»
Абай облысының мәдениет, тілдерді дамыту және архив ісі басқармасының ұйымдастыруымен тұңғыш рет өтіп отырған Бекен Жылысбаев атындағы республикалық вокалистер байқауына Астана, Алматы, Шымкент, Жезқазған, Түркістан, Қызылорда, Ақмола, Ақтөбе, Атырау, Семей, Көкшетау қалаларынан келген 19 жас өнерпаз бақ сынауда.
Жастардың өнерін қазылар алқасы — әйгілі әншінің шәкірттері — Қазақстанның халық әртісі, Қазақстан мемлекеттік сыйлығының лауреаты Нұржамал Үсенбаева, Мемлекеттік «Дарын» жастар сыйлығының иегері, опера әншісі Азамат Жылтыркөзов, Қазақстанның еңбек сіңірген қайраткері Талғат Мұсабаев, ҚР мәдениет саласының үздігі Танагүл Бекназарова, ҚР мәдениет қайраткері Нұрлан Көшеров бағалайды.
Байқау алдында БАҚ өкілдеріне арналып баспасөз мәслихаты өтті. Баспасөз мәслихатында талантты ұстаздың тәлімін алып, өнер жолына қанат қаққан шәкірттері естеліктерін бөлісіп, байқауға қатысушыларға сәттілік тіледі.
— Мұқан Төлебаевтың «Тос мені, тос», «Кестелі орамал», Абай өлеңіне жазылған «Мен көрдім ұзын қайың құлағанын» романстарын, «Қазақстан оттары» кантатасын, тағы басқа да шығармаларды алғаш орындап, дауыс диапозонының кеңдігімен көрерменін тәнті еткен әйгілі әнші Бекен Жылысбаевтай дарынды тұлғаның шәкірті болғанымды мақтан етемін. Ұстазымыздың шәкірттері қазіргі күні әлемнің бірқатар елінде өнер саласында қызмет атқаруда, — деді Нұржамал Үсенбаева.
Республикалық вокалистер байқауының ашылуында сөз алған Аягөз ауданы Баршатас ауылының әкімі Асхат Әділжанұлы, Аягөз ауданы ішкі саясат, мәдениет, тілдерді дамыту және спорт бөлімінің бас маманы Перизат Амангелдинова Аягөз ауданының әкімі Қанат Әбілбайдың құттықтауын жеткізіп, байқауға Алматы қаласынан арнайы келген Бекен Жылысбаевтың қыздары — Ардақ Бекенқызы мен Аида Бекенқызының иықтарына қамзол жауып, құрмет көрсетті.
Байқау екі кезеңмен — 12-13 қазан күндері өтті.
