Биыл Семей тарихының қарашаңырағы — облыстық тарихи — өлкетану музейіне 140 жыл толып отыр. Осыған орай Alikhan Bokeikhan университетінің бас ғимаратында «Семей-Ертіс өңірінің археологиялық мұрасы, этнографиясы және музей ісі» атты халықаралық ғылыми-тәжірибелік конференциясының пленарлық отырысы өтті.
Абай облысы әкімдігінің музейлерге қойып отырған талабы — өлкенің тарихи-мәдени мұраларын сақтау, зерттеу, жинақтау, рухани құндылықтарын насихаттау. Қазыналы қарт Семейдің тарихы терең әрі бай екені мәлім, бірақ, сол тарихымыз заман үрдісіне сай жүйеленбей келеді. Осы тақырыпта музейдің мерейлі датасына арналған конференция жаңадан құрылған Абай облысының тарихи хронологиясын тағы бір зерделеп, тарихи-мәдени мұрасын кешенді зерттеуге бағытталды.
Шараға Абай облысының әкімдігі, мәдениет, тілдерді дамыту және архив ісі бақармасының өкілдері, ҚР Ұлттық музейі, Жетісу облысының М.Тынышбаев атындағы тарихи-өлкетану музейі, Қостанай облыстық тарихи-өлкетану музейі қызметкерлері, мәдениет мекемелері, ЖОО оқытушылары, Семей қаласы мектептерінің тарих пәнінің мұғалімдері, зиялы қауым және БАҚ өкілдері қатысты.
Конференция алдында қонақтар мен қатысушыларға Семейдің тарихи — өлкетану музейінің «Семей: өткен ғасырға саяхат», «Алтын адам», «Бозай алтыны» көрмелері таныстырылды.
Шараны Абай облысы әкімінің аппарат басшысы Жасұлан Сәрсебаев және Облыстық тарихи – өлкетану музейінің директоры Қайрат Сабырбаев жүргізді.
Конференцияға шетел, еліміздін түкпір-түкпірінен ғалымдар, өлкетанушылар, археологтар мен музей мамандары шақырылған.
Археолог, тарихшы ғалымдардың ғылыми негіздемесіне сүйеніп, өңір тарихын тас дәуірінен бері қарайғы кезеңдерге жіктеу – басты мақсаттардың бірі. Осы орайда, Ә.Марғұлан атындағы археология институтының профессоры Зейнолла Самашев, Ө.Марғұлан атындағы археология институтының директоры Оңғар Ақан, Семей қаласы Шәкәрім атындағы университетінің профессоры, Амантай Исин, Англияның Лестер университеті археология және ежелгі тарих мектебі, Таяу Шығыс пен Солтүстік Африкадағы жойылып кету қаупі төнген археология бөлімінің ғылыми қызметкері Доктор Кенави, Ресейден Алтай мемлекеттік университетінен Николай Головченко, Италиядан жоғары ғылым мектебінің «Мәдени мұраны талдау және басқару» бағдарламасының аспиранты Кристина Бекенова, Әл-Фараби атындағы Қазақ ұлттық университетінің доценті Ғани Омаров, Л.Н.Гумилев атындағы ЕҰУ-нің археология кафедрасының меңгерушісі Ұлан Үмітқалиев, Әл-Фараби атындағы Қазақ ұлттық университетінің докторанты Оралбай Ерден және басқа да ғалымдар тас дәуірінен бергі Ертіс – Семей өңіріндегі археологиялық ескерткіштер мен олардың маңыздылығы туралы баяндамалар оқып, облыстық археологиясын дамыту жайлы ұсыныстарын білдірді. Баяндамаларын ZOOM платформасы арқылы фотосуреттермен ұсынды.
— Конференцияда айтылар ғылыми негіздемелер мен дәйекті ұсыныстар музейдің алдағы жоспарларына арқау болмақ. Болашақта Абай облысы археологиялық ескеткіштерінің тізімін, Абай облысы тарихи және киелі жерлерінің картасын, Семей-Ертіс өңірі археологиялық мұрасының 3D форматын, Семей-Ертіс тарихи кезеңдерінің хронологиясын дайындау секілді жобаларды жүзеге асыру көзделіп отыр, — деді Абай облысы әкімінің аппарат басшысы Жасұлан Сәрсебаев.
