Semeytany.kz – Абай облысының әкімі Берік Уәли бүгін Аягөз қаласында аудан тұрғындарымен кездесіп, өңірдің даму барысын, алдағы жоспарларды және халықты толғандырған өзекті мәселелерді талқылады. Жиынның басында аудан әкімінің міндетін атқарушы Айбек Нұғымаров 2024-2025 жылдарға арналған негізгі көрсеткіштер мен атқарылып жатқан жұмыстар туралы баяндама жасады.
Аягөз – облыстың мал шаруашылығы мен егіншілігі дамыған жетекші аудандарының бірі. Мұнда ірі қара малдың облыстағы жалпы үлесінің 16,3 пайызы, ұсақ малдың 18,1 пайызы шоғырланған. Ауыл шаруашылығының 2031 жылға дейінгі өңірлік инвестициялық жобалар картасына сәйкес, Аягөз ауданында жалпы құны 9,8 млрд теңгені құрайтын бес жоба жүзеге аспақ. Бұл бастамалар ауыл шаруашылығы өнімдерінің көлемін арттырып, жаңа жұмыс орындарын ашуға және аудан экономикасын әртараптандыруға мүмкіндік береді.
Кездесу барысында облысқа инвестиция тарту мәселесі де кеңінен сөз болды. Биыл өңір бойынша инвестициялық жобалар саны 29-дан 97-ге дейін өсіп, инвестиция көлемі 2,2 трлн теңгеден 3,5 трлн теңгеге жетті. Аягөз ауданының өзінде жалпы құны 1,9 трлн теңгені құрайтын, шамамен 5 мың жаңа жұмыс орнын ашуды көздейтін алты ірі жоба жүзеге асырылуда.
Инфрақұрылымды жаңарту – аудан үшін басым бағыттардың бірі. Биыл Аягөз қаласындағы жылу жүйесі жаңартылып, «Орталық» қазандығына қуаты 10 Гкал/сағат болатын үш жаңа қазандық орнатылды, сондай-ақ 3,9 шақырым жылу құбыры ауыстырылды. Су жүйесін жаңарту жұмыстары да кезең-кезеңімен жалғасуда. Байқошқар, Қорық және Ай (Мыңбұлақ) ауылдарының 2 мыңға жуық тұрғыны биыл таза ауыз сумен қамтылатын болады.
Білім беру саласында да бірқатар оң өзгерістер бар. Биыл Бозтаев атындағы мектеп-гимназия, №7 орта мектеп және Қадыржанов атындағы мектепке күрделі жөндеу жүргізілді. Сонымен қатар ауданның 16 білім ошағында ағымдағы жөндеу жасалып, пән кабинеттері жаңартылды, жаңа жабдықтар орнатылды. «Келешек мектептері» ұлттық жобасы аясында Аягөз қаласында 600 орындық жаңа мектеп пайдалануға берілді.
Денсаулық сақтау саласында Аягөз аудандық ауруханасының материалдық-техникалық базасы күшейтілуде. Медициналық мекемеге жаңа жабдықтар сатып алынып, реанимациялық бөлімнің аумағы кеңейтілді, қосымша ғимарат салынды. Магниттік-резонанстық томограф орнату үшін жеке корпус құрылысына қаржы бөлінді. Келесі жылы ауданға бес жедел жәрдем көлігін беру жоспарланып отыр.
Кездесу барысында тұрғындар ауыл инфрақұрылымы, жол, ауыз су, жарықтандыру және әлеуметтік нысандардың жұмысына қатысты өз ұсыныс-пікірлерін жеткізіп, сұрақтар қойды. Аймақ басшысы әрбір сауалды мұқият тыңдап, нақты жауап берді.
«Бүгін сіздермен кездесіп, атқарылған жұмыстардың есебін ұсынып, көкейлеріңіздегі сұрақтарға жауап беру үшін келіп отырмын. Бұған дейін де Аягөзге бірнеше рет арнайы келіп, әлеуметтік нысандарды аралап, ауылдардың тыныс-тіршілігімен таныстым. Ауданның жағдайын да, сіздерді алаңдататын мәселелерді де жақсы білемін. Аягөз – облысымыздағы халқы ең көп аудандардың бірі. Сондықтан осында екі күнге келіп, сіздермен жан-жақты әңгімелесуді жөн көрдік. Жол, ауыз су, жарықтандыру сынды мәселелер кезең-кезеңімен, жүйелі түрде шешіледі. Ауданның дамуы менің жеке бақылауымда болады», – деді Берік Уәли.
