Ұлттық мереке қарсаңында еліміздің өркендеуіне үлес қосқан қазақстандықтарға мемлекеттік марапаттар тапсырылды. Олардың қатарында ғасыр жасына екі-ақ жыл қалған аймағымызға аты таныс ардагер ақсақал Әбдеш Имаханов та бар.
98 жастағы облыс тұрғыны Әбдеш Имаханов салтанатты іс-шараға қатыса алмағандықтан, облыс әкімі Нұрлан Ұранхаев еңбек ардагерінің үйіне арнайы барып құттықтап, «Құрмет» орденін табыстады.
Әбдеш Имаханов өзінің бар ғұмырын туған өңірін көркейтуге арнады. 1970-1978 жылдар аралығында ауылдық кеңесті басқарып, ауданның өркендеуіне өлшеусіз үлес қосты. Еділбай қойының тұқымын жаңғырту бағытында үлкен жұмыс атқарды. Осы саладағы жетістіктерінің арқасында өзі еңбек еткен кеңшарға «асыл тұқымды мал өсіргені үшін» сертификат берілген болатын. 2002 жылы Әбдеш Имаханов Қасқабұлақ ауылдық округіндегі «Шиліөзек» учаскесінде «Әбдеш ата» атты жеке шаруа қожалығын құрды.
Ақсақалдың жеткен жетістігі ауыл шаруашылығындағы қажырлы еңбегімен ғана шектелмейді. Әбдеш Имаханов өзінің көп балалы отбасымен де мақтанады. Ардагер 10 бала өсіріп, бүгінде 37 немере, 24 шөбере сүйіп отыр. Еңбек ардагерінің отбасылық құндылықты дәріптеуі және қоғам өміріне белсене араласуы — ұрпаққа үлгі.
Өз тілшіміз
