Қр Денсаулық сақтау вице — министрі Эрик Байжүнісов «Жан-Ер» стоматологиялық орталығында болды. Жуырда ғана пайдалануға берілген орталықтың мамандандырылған және тіс емдеу бөлмелерімен, рентген, орталық залалсыздандыру, тістехникалық зертхана, физиоемдеу, хирургия және балалар тіс емханасы бөлмелеріндегі құрыл- ғылармен танысты. Балалар тіс емханасы бөлмесін та-ныстырған орталық директоры Сиязбек Ахметов тіс емдеу барысында балалардың көңілін аулау үшін арнайы құрылғылар орнатылғандығын, қабылдауға келген әр бала бұл жерден ризашылықпен қайтатынын айтты.
— Қазіргі уақытта біз орталықта тіс емдеудің барлық түрін жүргіземіз. Ең жеңіл тіс ауруларынан бастап, күрделі тіс ауруларына дейін, тіске күрделі ота жасау, хирургиялық емдеу, заманауи технологияда тіс түзету, имплонтация және протездеу, тіс ауруларының алдын алумен бірге емдеу шараларын жүргіземіз, — деген емхана ұжымына Эрик Байжүнісов:
-Жарайсыздыр!-деп баға беріп, — мемлекет тарапынан қандай көмек қажет?- деп сұрады.
Мемлекет тарапынан мемлекеттік тапсырыс жөнінен қолдау болып жатса, қалғаны өз ретіне келетіндігін айтқан С. Ахметов мемлекеттік тапсырыспен жұмыс істеуге дайын екендіктерін жеткізді. Сонымен қатар, бұл орталық балалар үйімен келісімге келіп, алдағы уақытта арнайы күн белгілеп, балаларды тегін қабылдамақ.
Тіс емханасынан кейін вице — министр өткен жылдың қыркүйек айында ашылған “IN VITRO+” жеке меншік емханасында болып, емдеу мекемесінің жұмысымен танысты. Тіркеу бөлімінен бастап, зертханалық және функционалдық диагностика, клиникалық, биохимиялық зертханалар мен инсульт алғандарға, сал ауруына шалдыққандарға ем жүргізіліп, емдік курс жасалып жатқан бөлмелермен де танысты. Осы емхананың құрылғылары көмегімен дене мүшелері қимылға келген инсультке шалдыққан науқастарға тезірек сауығып кетуге тілектестік білдірді.
-Инсульттен кейін науқастардың 60-70 пайызы қалыпты өмір жағдайына қайта оралады. Сондықтан, сырқаттар инсультке шалдыға салысымен, дереу оңалту орталығына келуі керек,- дейді емхана директоры Нәсиба Изатоллаева.
Бұл мүмкіндікті осы емханадағы заманауи құрылғылар сыйламақ. Сондай-ақ, шет елден әкелінген түрлі құрылғылар бүгінгі заман талабына сай жұмыс істеуге мүмкіндік береді, емхананың бірден-бір артықшылығы да осында. Мысалы, шет елден әкелінген “Evolis” құрылғысы ШҚО — да біреу ғана болса, еліміз бойынша бес емдеу орталығында орнатылған. Сол құрылғылардың қызметімен жылдар бойы байқалмаған С гепатитінің 99 пайызын анықтауға мүмкіндік туып отыр. Бұл жөнінде:
— С гепатитінің көлемі артып кетті деп қорықпау керек, керісінше, сол гепатитті анықтау мүмкіндігіне ие болдық деп қуану керек. Біз ол науқастарды емдейміз, тегін дәрі-дәрмек ұсынамыз,- деді Эрик Байжүнісов.
Зертханалардың мүмкіндіктерімен танысқан вице — министр алдағы уақытта ауруханалармен байланыс орнатып, зертханалық жұмыстарды жүргізу қажеттігін айтты. Осындай орталықтар неғұрлым көп болса, соғұрлым мемлекетіміз үшін өте жақсы екенін айтқан вице — министр:
-Қазір біз сауықтыру тарифтерін есептеп жатырмыз. Жыл соңында бюджетте қаржы қалса, сіздерге инсульттен кейінгі науқастарды емдеуге мемлекеттік тапсырма ретінде бөлеміз, — дей келе, бұл емхананы заманауи құрылғылармен жабдықталған еліміздегі жетекші емханаларының бірі деп бағалады.
Келесі кезекте Эрик Байжүнісов жаңадан салынып жат-қан радиологиялық орталыққа да бас сұқты. Қолданысқа беріле қоймаған емхананың әр қабатын аралап, орнатылып жатқан қондырғылармен танысты. «Бұл орталық Қазақстандағы ең жақсы, заманауи орталық болмақ. Басқа қалаларда онкологиялық орталық ашылғанға дейін еліміздің түпкір-түпкірінен науқастар сіздерге келетін болады. Мына технологиялар іске қосылғанда қатерлі ісік гастрит ауруындай болып қалатын болады», — деген вице — министр науқастардың бұл орталықты асыға күтіп отырғанын жеткізді. Радиологиялық орталық басшылығы алдағы уақытта науқастарға арнап пансионат салу да жоспарда бар екенін айтты.
Бұдан кейін вице — министр Физкультурная көшесінде жаңадан ашылған №3 диагностикалық емдеу орталығының жұмысымен танысты. Емхана бүгінгі заман талабына сай жабдықталған, қызмет көрсету сапасы да аса жоғары деп бағаланған емханадағы сандық рентген құрылғысы бар болғаны сегіз минут ішінде рентген нәтижесінің қорытындысын шығарып бере алады. Емдеу мекемесінің бір тәулікте 300 адамға дейін қабылдауға қауқары бар. Сонымен қатар, емхана қызмет көрсетудің 23 түрі бойынша бейімделген. Емдеу мекемесі акушер — гинекология, невропатология, гастроэнтерология, гематология, кардиология, физотерапия, эндокринология, онкология, хирургия, травматология, ортопедия және тағы да басқа қызмет түрлерін ұсына алады. Жаңа емхананың жұмысымен, кең, жоспармен салынған әр кірпішін бағамдаған Эрик Байжүнісов:
-Емхана салу жай ғимарат салу емес, емхана салу үшін жүрекпен сезіну керек. Еліміздің әр аймағына емхана салатын қаржы жоқ деген мәселелер көп. Осылай кәсіпкерлерді бұл іске тарту керек,-деді.
Вице — министрдің бұл сөзі қаладағы емханалардың құрылысына, жұмысына берілген баға еді.
Ерзат ЖАНАТҰЛЫ,
Нұрдәулет КӘКІШЕВ,
Әйгерім СӘРСЕНҒАЛИ,
“Семей таңы”.
