Семей таңы – Инвестициясыз даму болмайды. Бұл туралы Шығыс Қазақстан облысының әкімі Берік Уәли кезекті аппараттық кеңесте шегелеп айтты. Жиында өңірлік жұмыспен қамту картасының орындалу барысы, әлеуметтік-экономикалық көрсеткіштер мен инвестиция тарту мәселесі кеңінен сөз болды, деп хабарлайды Semeytany.kz тілшісі.
22 мыңнан астам жұмыс орны құрылмақ
Облыстық жұмыспен қамту және әлеуметтік бағдарламаларды үйлестіру басқармасының мәліметінше, биыл өңірде 22 885 жұмыс орнын ашу көзделген. Оның 14 873-і — тұрақты, ал 7 808-і — уақытша жұмыс орындары болмақ.
Жұмысқа орналастыру ұлттық және мемлекеттік бағдарламалар аясында жүзеге асуда. Атап айтқанда, «Ауыл аманаты», «Дипломмен ауылға» жобалары мен инфрақұрылымдық бастамалар шеңберінде жұмыс күші тартылуда.
Ал өңірлік жұмыспен қамту картасының субсидияланатын бағыттары арқылы қазіргі таңда 5 323 адам жұмыспен қамтылған. Сондай-ақ, Президенттің 10 мың адамға шаққанда 100 жаңа жұмыс орнын ашу тапсырмасына сәйкес, жаңадан ашылған кәсіпорындарда 824 адам еңбекке тартылған.
Семей мен Аягөздің белсенділігі төмен
Кеңесте Семей, Курчатов қалалары мен Аягөз, Ақсуат, Бородулиха, Көкпекті, Мақаншы аудандарында жұмыс орындарын ашу жоспары мардымсыз орындалып жатқаны айтылды.
Берік Уәли әкімдерге бұл бағыттағы жұмысты жандандыруды тапсырды:
«Облыста 10 790 адам ресми жұмыссыз ретінде тіркелген. Тіркелмегені қаншама. Ауылда жұмыс болмаған соң, ел облыс орталығына ағылуда. Қалаға келген адамға жұмыс тауып, баспана, мектеп, балабақша мен емхана мәселесін шешу оңай емес. Сондықтан әр аудан өз ішінде жаңа жұмыс орындарын ашуға міндетті. Бұл – әкімдердің негізгі жұмысы», – деді аймақ басшысы.
Сондай-ақ әкім, жұмыс орындары қағаз жүзінде емес, нақты болу керек екенін, зейнетақы жарналары мен еңбек шарттарының рәсімделуін ерекше бақылауда ұстау қажеттігін ескертті.
88,3 млрд теңге инвестиция тартылған
Экономика және бюджеттік жоспарлау мен Қаржы басқармаларының басшылары баяндама жасап, облыстың алғашқы 4 айдағы әлеуметтік-экономикалық даму қорытындыларына тоқталды. Былтырмен салыстырғанда 10 негізгі көрсеткіш бойынша өсім бар. Жыл басынан бері облысқа 88,3 миллиард теңге инвестиция тартылған. Бұл — нақты көлем индексімен есептегенде 116 пайыз.
Дегенмен, өңдеу өнеркәсібі, тау-кен өндірісі, құрылыс пен тұрғын үйді пайдалануға беру бағыттарында көрсеткіштер төмендеген.
Осыған байланысты Берік Уәли бюджет кірісі мен шығысын жоспарға сай орындау керектігін атап өтті. Ал инвестиция тарту мәселесіне келсек, әкім өз тәжірибесімен бөлісті:
«Қызметке тағайындалған сәттен бастап 40-тан астам инвестормен кездестім. Алайда, аудан әкімдері бұл бағытта белсенді емес. Әлі де болса, бюджетті ғана арқа тұтып отыр. Қымбат офтейк келісімдеріне жабысып алған. Сондықтан инвестиция тарту бағытындағы жұмысты күшейту қажет», – деді өңір басшысы.
Ерлан Айқынұлы,
Semeytany.kz
