Семей таңы – Туған өлкенің тазалығы – әр азаматтың парызы. Осы ұстаныммен Абай облысында Мемлекет басшысы бастамашы болған «Таза Қазақстан» экологиялық бағдарламасы аясында кең ауқымды сенбілік өтті. Шараға 197 мыңнан астам тұрғын қатысып, өңірдегі елді мекендер, өзен жағалаулары мен қоғамдық орындар тазартылды, деп хабарлайды Semeytany.kz тілшісі.
Семей мен Курчатовта — өзен жағалауына ерекше назар
Семейде 50-ден астам студент пен ерікті Ертіс өзенінің сол жағалауындағы көпір маңын қоқыстан тазартты. Жастар бұл қадам арқылы өңірдің экологиялық мәдениетін қалыптастыруға үлес қосты.
Курчатов қаласында да жағажай маусымына дайындық шеңберінде жағалау аймағы тазаланып, арнайы ескерту белгілері орнатылды. Жастар белсендісі Сержан Ерболатұлының айтуынша, сенбілік — туған жерге жанашырлық танытудың жарқын көрінісі.
Үржар мен Аягөзде — ауқымды тазалық шарасы
Үржар ауданында 30-дан астам мекемеден 300-ден астам адам қатысып, Балалар және «Болашақ» саябақтары абаттандырылды. Мөлдір Токтамысова:
«Бұл сенбілік — болашақ ұрпаққа үлгі болатын қадам», – деді.
Аягөз ауданында 200-ге жуық адам қатысып, Аягөз өзенінің бойынан 70-тен астам қап қоқыс жиналды.
Ерекше формат — интеллектуалды квест
Бородулиха ауданында сенбілік ерекше үлгіде — квест-форматта өтті. Жас еріктілер карта бойынша аумақтарды іздеп, белгіленген нүктелерді тазалады. Бұл әдіс сенбілікті қызықты етіп қана қоймай, командалық рухты да нығайтты.
Нәтиже: мыңдаған тонна қоқыс шығарылып, мыңдаған ағаш егілді
Жалпы облыс бойынша:
-
9 092 ұйым мен 6 573 техника жұмылдырылды;
-
122 мың аула, 1 777 саябақ пен 733 ескерткіш айналасы тазартылды;
-
35,5 мың тонна қатты тұрмыстық қалдық полигондарға жеткізілді;
-
46 348 ағаш пен бұта отырғызылды;
-
2 072 су айдыны, 144 субұрқақ пен 88 мың метр арық тазаланды.
Сондай-ақ 26 сәуір күні «Бүкілқазақстандық ағаш отырғызу күні» аясында қосымша 23 мыңнан астам көшет егілген.
«Таза Қазақстан» — бір реттік емес, мәдениет қалыптастыратын қозғалыс
«Абай жастары» ресурстық орталығының директоры Айдос Төлеуканов бұл бастаманың маңыздылығына тоқталып:
«Бұл — туған жерге деген жауапкершілікті арттыратын жүйелі қозғалыс. Әрбір қатысушының үлесі — жарқын болашаққа жасалған қадам», – деді.
Экологиялық акциялар өңірдегі барлық елді мекендерді қамтып, алдағы уақытта шалғай ауылдарды да қамти бермек.
