Семей таңы – Семей қаласында чиптер мен электронды құрылғылар шығаратын индустриялық парктің құрылысы ресми түрде басталды. «Өндіріс» индустриялық аймағында бой көтеретін бұл зауыт Қазақстандағы жоғары технологиялық өндірістердің алғашқы қарлығаштарының бірі болмақ, деп хабарлайды Semeytany.kz тілшісі.
Жаңа кәсіпорынның іргетасын қалау рәсіміне Абай облысының әкімі Берік Уәли мен шетелдік инвесторлар қатысты. Жобаны «SUTO KAZAKHSTAN» ЖШС атты қазақстандық-қытайлық бірлескен компания жүзеге асырады. Кәсіпорын чип, оптоэлектронды модульдер, қуат блогы, интеллектуалды хост-контроллерлер, энергия үнемдейтін шамдар мен электронды дисплейлер өндірісіне маманданады.
Жоба – жуырда облыс делегациясының Қытай Халық Республикасына жасаған сапарының нақты нәтижесі. Атап айтқанда, Шыңжаңның Алтай қаласында өткен «Үлкен Алтай» субөңірлік конференциясы аясында 1,5 миллиард АҚШ долларына тең 15 меморандумға қол қойылып, инвестициялық әріптестік жолға қойылған болатын.
Іргетас қалану рәсімінде аймақ басшысы бұл жобаның өңір экономикасын әртараптандыруға, заманауи өндірісті жолға қоюға және жүздеген жаңа жұмыс орнын ашуға серпін беретінін айтты. Құрылыс кезеңінде 140 адам жұмысқа тартылады, ал зауыт іске қосылған соң 500-ден астам тұрақты жұмыс орны ашылады. Жалақы көлемі 250 мыңнан 500 мың теңгеге дейін болмақ.
Бұған қоса, зауыт жергілікті жастарды жұмыспен қамтуға ниетті. Семейдегі IT және жаңа технологиялар жоғары колледжімен өзара келісімге келіп, студенттерге өндірістік тәжірибе ұсыну және үздіктерін тұрақты жұмысқа алу жөніндегі меморандумға қол қойылды.
Жобаның жалпы құны – 50 миллион АҚШ доллары. Құрылыс үш кезеңмен, 2025–2028 жылдар аралығында жүзеге асады. Кәсіпорын 20 гектар аумақта орналасып, өнімін ішкі нарықпен қатар ТМД елдері мен Еуропаға экспорттауды көздеп отыр.
«Енді Семейде “Қазақстанда жасалған” деген белгісі бар чиптер өндіріледі. Бұған дейін елімізде мұндай өнім шығарылмаған, тек құрастырумен шектеліп келдік. Енді өзіміз өндіріп, нарыққа шығарамыз», – деді «SUTO Kazakhstan» ЖШС құрылтайшысы Ернұр Болатұлы.
Алғашқы зауыт ғимаратының құрылысы небәрі 90 күнде аяқталып, алғашқы өнім осы жылы шығарыла бастамақ.
