Семей таңы – Абай облысына Қазақстан Республикасы Президентінің кеңесшісі Мәлік Отарбаев жұмыс сапарымен келіп, әлеуметтік сала өкілдерімен, құқық қорғау құрылымдары мен білім, дін саласының мамандарымен бірқатар кездесу өткізді, деп хабарлайды Semeytany.kz тілшісі.
Сапар аясындағы алғашқы жүздесу әлеуметтік қызметкерлермен өтті. Мәлік Отарбаев жиын барысында Мемлекет басшысы Қасым-Жомарт Тоқаевтың сәлемін жеткізіп, Ұлттық құрылтайдың IV отырысында көтерілген басты мәселелер мен стратегиялық бағыттарға тоқталды.
«Президентіміз атап өткендей, ел болашағы үш негізгі құндылыққа – әділдікке, ұрпақтар сабақтастығына және өрлеуге негізделуі тиіс. Әділ шешім қабылдай алатын азамат қана қоғамға нақты пайда әкеле алады», – деді Мәлік Отарбаев.
Кейін ол құқық қорғау және әскери құрылым өкілдерімен кездесті. Бұл жиында «Заң мен тәртіп» қағидатының маңыздылығы атап өтілді. Кеңесші Мемлекет басшысының бағдарламалық баяндамасын мемлекеттік саясаттағы маңызды құжат ретінде бағалап, айтылған бастамалар қоғамдағы өзекті мәселелерді шешуге бағытталғанын жеткізді.
«Басты міндет – мемлекетті сақтау, тәуелсіздікті нығайту және мемлекетшілдік дәстүрді жалғастыру», – деді Президент кеңесшісі.
Кездесуде облыстық прокуратура, полиция департаменті және ішкі істер органдары ардагерлері кеңесінің өкілдері өңірдегі құқықтық тәртіпті сақтау бойынша атқарылып жатқан жұмыстар жөнінде баяндама жасады.
Сапар соңында Мәлік Отарбаев Шәкәрім университетінің профессорлық-оқытушылық құрамымен және жас ғалымдармен жүздесіп, білім мен ғылымдағы жаңа міндеттерді сөз етті. Сондай-ақ Қазақстан халқы Ассамблеясы мен діни бірлестіктердің өкілдерімен кездесіп, қоғамдық келісім мен ұлттық бірлікті нығайту мәселелерін талқылады.
