Semeytany.kz – Абай облысында ірі ағаш өңдеу кешенінің құрылысы басталды. Бүгін Семей қаласында зауыттың іргетасын қалау рәсімі өтті. Маңызды шараға облыс әкімінің бірінші орынбасары Ербол Садыр, «Универсал СМ» ЖШС бас директоры Жандос Тұрсынғали және жобаның шетелдік серіктесі «Chang Xing Group» компаниясының өкілдері қатысты.
Жобаның жалпы құны – 10 миллиард теңге. Кешен толық іске қосылғанда 500 жаңа жұмыс орны ашылады деп жоспарлануда. Жаңа өндіріс ошағында экологиялық таза, заманауи технологиялар қолданыла отырып, ағаш плиталары, сондай-ақ теміржол мен трамвай жолдарына арналған шпалдар шығарылмақ. Кешеннің жобалық қуаттылығы – жылына 500 мың текше метр ағаш материалын өңдеу.
Ағаш өңдеу кәсіпорнына өңірлік үйлестіру кеңесінің шешімімен өндірістік аймақтан жер телімі бөлінген. Құрылыстың алғашқы кезеңін 2026 жылы іске қосу көзделуде.
Салтанатты рәсімде сөз сөйлеген облыс әкімінің бірінші орынбасары Ербол Садыр жоба өңір экономикасы үшін маңызға ие екенін атап өтті:
– Бұл – біздің облысымыз үшін және Семей қаласының дамуы үшін өте қажетті жоба. Жаңа жұмыс орындары ашылып, экологиялық таза және инновациялық технологияларды енгізуге үлкен мүмкіндік аламыз, – деді ол.
Жоба шеңберінде өндірістік қуат қана емес, кадр даярлау, логистика, экспорт әлеуеті сынды бағыттар бойынша да өңірлік дамуға серпін берілмек.
