Semeytany.kz – Семей қаласында облыстық прокуратураның жаңартылған ғимараты салтанатты түрде ашылды. Маңызды шараға Абай облысының әкімі Берік Уәли, Қазақстан Республикасының Бас прокуроры Берік Асылов және құқық қорғау саласының өкілдері қатысты.
40 жылдан астам уақыт бойы күрделі жөндеу көрмеген нысан бұған дейін әртүрлі мекемелерге тиесілі болған. Облыстық прокуратураның қарамағына берілгеннен кейін, ғимарат республикалық бюджет есебінен толық жөнделіп, қазіргі заман талаптарына сай жабдықталды. Енді мұнда прокуратура қызметкерлері үшін барлық қажетті техника мен жайлы жұмыс жағдайы қарастырылған.
Шара барысында облыс әкімі Берік Уәли сөз сөйлеп, нысанның құқықтық тұрақтылық пен әділеттілік қағидаларын орнықтыру жолындағы маңызын атап өтті:
– Мемлекет басшысы Қасым-Жомарт Тоқаев Ұлттық құрылтайдың төртінші отырысында қоғамда Заң мен тәртіпті орнықтыру қажеттігін ерекше атап өтті. Прокуратура ұжымына жасалған бұл жағдай – «Әділетті Қазақстан» идеясымен үндесетін маңызды қадам. Енді осы жаңа ғимаратта азаматтардың құқығын қорғау жолында нәтижелі қызмет етіледі деп сенемін, – деді аймақ басшысы.
Мерекелік рәсім аясында Ұлы Отан соғысының ардагері, заң саласында ұзақ жылдар бойы еңбек еткен Фазыл Әділбаевтың құрметіне ғимарат қабырғасына ескерткіш тақта орнатылды.
Сондай-ақ облыс әкімі мен Бас прокурор Семейде салынып жатқан 100 орындық психоневрологиялық медициналық-әлеуметтік мекеменің құрылыс алаңында болып, іргетасын қалау рәсіміне қатысты. Бұл нысан прокуратура органдары мемлекетке қайтарған активтер есебінен салынып жатыр. Ғимарат іске қосылған соң, әлеуметтік қолдауға мұқтаж жандарға арналған сапалы медициналық көмек көрсетіледі. Қазіргі таңда облыс бойынша дәл осы қызметке зәру 101 адам ресми кезекте тұр.
Айта кетейік, республика бойынша прокуратура органдары қайтарған активтер арқылы 333 әлеуметтік жоба жүзеге асырылуда. Оның 15-і Абай облысына тиесілі. Бұл жобалар қатарында медицина, ауыз сумен қамтамасыз ету және әлеуметтік қолдау салалары қамтылған.
