Semeytany.kz – Ақсуат ауданында Абайдың 180 жылдығына арналған ауқымды «Асыл бесік – Ақсуат» республикалық спорт және өнер фестивалі басталды. Үш күнге жоспарланған салтанатты шараның шымылдығы «Асыл тас» театрының «Мені тауып алшы» спектаклімен түрілді.
Фестивальдің ресми ашылуына облыс әкімі Берік Уәли қатысып, туған жерге қызмет етудің маңыздылығын атап өтті. «Бұл – ел бірлігі мен ұлттық рухты дәріптейтін үлкен оқиға. Абай елінде елге шын жанашыр азаматтар әрқашан ерекше құрметке ие. Солардың бірі – белгілі кәсіпкер Дулат Тастекеев. Ол туған жерге жанашырлықты нақты іспен көрсетіп келеді», – деді аймақ басшысы.
Инвестициялық серпін мен нақты жобалар
Берік Уәли өз сөзінде Ақсуат ауданында жүзеге асырылып жатқан маңызды жобаларды да атап өтті. Атап айтқанда:
-
Ақсуатқа кіре беріс жол төрт жолақты болып кеңейтілді;
-
Көкжыра ауылында мәдениет үйінің құрылысы басталды;
-
Ақсуат орталық ауруханасы күрделі жөндеуден өтуде;
-
48 отбасы жаңа пәтерге ие болмақ;
-
Екпін мен Ойшілік ауылдарында спорт кешендері бой көтеруде;
-
Тебіске өзені арқылы өтетін көпір жаңғыртылып жатыр.
Сонымен қатар, ұзақ жылдар тоқтап тұрған Ақсуаттағы жаңа мектеп құрылысы облыстық бюджет есебінен аяқталатын болды. Ал Екпін ауылындағы апатты мектеп мәселесі де биыл шешімін таппақ.
Спорт пен өнер тоғысқан алаң
Фестиваль аясында республикалық «Assyl Arlan» қазақ күресі турнирі өтті. 74 келіге дейінгі салмақта 24 балуан (Өгіз балуан), ал +74 келіде 18 балуан (Түйе балуан) өзара мықтыны анықтады. Кешкілік жұртшылық әнші Гүлдана Ноғайбаеваның «Елге сәлем» жеке концертін және «Қазақша терапия» әзіл-сықақ тобының өнерін тамашалады.
Ат бәйгесі мен Гала-концерт
Фестиваль аясындағы басты шаралардың бірі – 8 маусым күні Екпін ауылындағы атшабарда өтетін «Assyl Tulpar» бәйгесі болмақ. Ал қорытынды кеште Ы.Досханаұлы атындағы стадионда «Асыл тас» театрының «Абай әлемі» қойылымы мен қазақ эстрада жұлдыздарының Гала-концерті өтеді.
Түйін:
Ақсуаттағы «Асыл бесік» фестивалі – туған жерге тағзым мен ұлттық дәстүрді дәріптеудің жарқын үлгісі. Ауыл мәдениеті мен спортын ұлықтайтын мұндай шаралар елді бірлікке ұйыстырып, Абай рухын жаңа биікке көтереді.
