Semeytany.kz – Абай облысының әкімі Берік Уәлидің төрағалығымен өткен кеңейтілген аппараттық кеңесте өңірдің өзекті мәселелері талқыланды. Жиынға облыстық басқарма мен департамент басшылары қатысып, аудан және қала әкімдері бейнебайланыс арқылы қосылды. Күн тәртібінде «Қарызсыз қоғам» жобасының іске асырылу барысы, «Таза Қазақстан» бағдарламасының жай-күйі және облысты ауыз сумен қамтамасыз ету мәселелері қаралды.
Энергетика және тұрғын үй-коммуналдық шаруашылығы басқармасының басшысы Раджан Сейітқановтың айтуынша, өңір тұрғындарын ауыз сумен қамту деңгейі қазіргі таңда 95,3 пайызды құрайды. Бұл көрсеткішті 100 пайызға жеткізу үшін жалпы құны 7,6 млрд теңгені құрайтын 26 жобаны жүзеге асыру қажет. 2025 жылға жоспарланған тағы 21 жоба су құбырларының тозуын азайтуға бағытталып отыр.
Қазіргі кезде облыстағы су желілерінің жалпы ұзындығы 3 687,9 шақырым болса, олардың орташа тозу деңгейі – 44,1 пайыз. Жаңа жобалардың іске асырылуы бұл көрсеткішті 35,1 пайызға дейін төмендетеді деп күтілуде. Айта кетерлігі, түгендеу барысында 102 блоктық-модульдік станцияның 25-і жұмыс істемейтіні анықталған. Облыс әкімі тиісті аудан әкімдеріне бұл нысандарды бір ай ішінде қалпына келтіріп, іске қосу жөнінде тапсырма берді.
– Мемлекет басшысы 2025 жылдың соңына дейін халықты толық ауыз сумен қамтамасыз етуді міндеттеді. Бұл – халық тарапынан жиі көтерілетін және өте маңызды мәселе. Аудан әкімдері жобаларды жыл соңына дейін аяқтауға күш салуы керек, – деді Берік Уәли.
Кеңесте сондай-ақ «Қарызсыз қоғам» жобасының өңірде іске асырылу барысы қаралды. Қаржы басқармасының басшысы Гүлфайрус Серікболова 2024 жылы 7352 адамды қамтыған 34 оқу өткізілгенін, биыл бұл жоба жаңартылып, «Қарызсыз қоғам 2.0» нұсқасында жалғасын тапқанын мәлімдеді. 17 ақпан мен 26 мамыр аралығында 1051 адам оқытылып, заңгерлік кеңес алған. Енді бағдарлама толық онлайн форматқа көшіп, жыл соңына дейін ай сайын 2500 адамды қамту көзделуде.
– Бұл жоба Мемлекет басшысының тікелей бақылауында. Қаржылық сауаттылық – халықтың әл-ауқатын арттырудың негізгі тетігі. Осыған қарамастан, азаматтардың белсенділігі төмен. Сондықтан аудан әкімдері ақпараттық-түсіндіру жұмыстарын жандандыруы тиіс, – деді аймақ басшысы.
Кеңес қорытындысында облыс әкімі барлық жобалардың жүзеге асырылу барысына қатаң бақылау жүргізуді, әсіресе ауыз су және әлеуметтік маңызы бар бастамалар бойынша нәтижелі жұмыс атқаруды тапсырды.
