Semeytany.kz – Бүгін Абай облысы әкімі Берік Уәли төрағалық еткен Қазақстан халқы Ассамблеясының ІІІ сессиясы өтті. «Бірлік пен келісім жолындағы 30 жыл» тақырыбындағы жиынға Ассамблея мүшелері, этномәдени бірлестіктер мен қоғамдық институттардың өкілдері қатысты.
Облыс әкімі сессияны ашып, Қазақстан халқы Ассамблеясының 30 жылдығымен құттықтап, оның қоғамдағы тұрақтылық пен келісімді нығайтудағы маңызды рөліне тоқталды.
«Мемлекет басшысы Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде «Ассамблея қоғамдық ұйымдармен және институттармен тығыз байланыста жұмыс істеп, еліміздің ішкі саясатын жүзеге асыруға белсене атсалысып келеді. Осылайша, мемлекет пен қоғам арасында сындарлы әрі жемісті сұхбат, яғни, диалог орнатуға ықпал етуде» деп атап өтті. Бұл Ассамблеяның Қазақстан қоғамындағы жасампаз рөлі мен этносаралық татулықтың қазақстандық үлгісін қалыптастырудағы қызметіне берілген жоғары баға болатын», – деп атап өтті аймақ басшысы.
Сессия барысында Мемлекет басшысының тапсырмасы бойынша Қазақстан халқы Ассамблеясының әлеуетін арттыру мақсатында бірқатар міндеттер талқыланды. Атап айтқанда, облыстағы Достық үйлерін туристік маршруттарға енгізу, этномедиацияны қолдау, этностық БАҚ-ты дамыту, жұмысшы мамандықтарының беделін көтеру және Федор Достоевский музейінің танымалдығын арттыру мәселелері белгіленді.
Қатысушылар пікір білдірді
Сессияда сөз алған «Возрождение» неміс этномәдени бірлестігінің төрайымы Лилия Гончарук, Абай облысы ҚХА мүшесі, «Ассамблея жастары» қозғалысының мүшесі Мадияр Насыров, «Қоғамдық келісім» КММ директоры Қазбек Хасаев, және «Ассамблея жастары» республикалық жастар қозғалысының мүшесі Ульяна Абашева Қазақстан халқы Ассамблеясының елдегі татулық пен тұрақтылықты нығайтудағы рөліне, сондай-ақ мемлекеттік тілдің мәртебесіне байланысты пікірлерін ортаға салды.
Мадияр Насыров сөзінде Абай Құнанбайұлының 180 жылдық мерейтойы аясында Мемлекет басшысының қолдауымен басталған «Абайға құрмет» республикалық акциясын атап өтті. Ол Маңғыстау облысының Достық үйін Абай облысына салатынын естігенде қуанышын білдіріп, бұл бастаманың өңірдің дамуына үлкен үлес қосатындығына сенім білдірді.
«Берекелі болса ел» деп хәкім Абай айтқандай, бірлігімізді танытып, жақсы істің басына жұдырықтай жұмылуға әзір екенімізді жеткізгім келеді», – деді Мадияр Насыров.
Түйін:
Сессияда Қазақстан халқы Ассамблеясының маңызды рөлін атап өту арқылы, еліміздің бірлігін нығайту мен тұрақтылықты сақтау мақсатында қолға алынған жобалар мен бастамалар талқыланды. Бұл жиын өңірлік деңгейде де этносаралық келісім мен бірлікті арттыруға бағытталған нақты қадамдар жасауға ынталандырушы фактор болды.
