Semeytany.kz – Семей қаласында Медицина қызметкерлері күніне орай салтанатты шара өтті. Жиынға облыс әкімі Берік Уәли, сала ардагерлері мен дәрігерлер қатысты.
Бүгінде Абай облысының денсаулық сақтау жүйесінде 9500-ден астам медицина қызметкері еңбек етуде. Олардың ішінде 2711 дәрігер және 6789 орта буын маманы бар.
Салтанатты шарада аймақ басшысы медицина қызметкерлерін кәсіби мерекелерімен құттықтап, халық денсаулығы жолындағы еңбектері үшін алғысын білдірді.
– Сіздердің жанкешті еңбектеріңіз бен жүрек жылуларыңыз адам өміріне үміт пен сенім сыйлайды. Денсаулық сақтау жүйесі – мемлекеттік саясаттың маңызды бағыты. Мемлекет басшысының тапсырмасына сәйкес, Семей қаласында облыстық көпбейінді клиникалық аурухана салынып жатыр. Бұл – өңір тарихында алғаш рет бой көтеріп жатқан ауқымды нысан. Сонымен қатар, «Ауылда денсаулық сақтауды жаңғырту» жобасы аясында биыл 65 жаңа медициналық пункт пайдалануға беріледі, – деді Берік Уәли.
Аймақ басшысы сондай-ақ өңірдегі медициналық ұйымдардың материалдық-техникалық базасын нығайту бағытындағы жұмыстарға тоқталды. Курчатов, Мақаншы, Бесқарағай, Жарма, Көкпекті, Аягөз, Үржар, Шүлбі және Шар секілді елді мекендерде аудандық ауруханаларды жаңарту, заманауи медициналық құрылғылар сатып алу, инженерлік инфрақұрылым тарту және жаңа амбулаториялар салу ісі қарқынды жүргізілуде.
Шара барысында өңір медицинасын дамытуға үлес қосқан 20-дан астам дәрігер мен сала маманы «Еңбек ардагері» медалімен, «Қазақстан Республикасының Денсаулық сақтау ісінің үздігі» төсбелгісімен және облыс әкімінің Алғыс хатымен марапатталды.
