Semeytany.kz – Жарма ауданының Суықбұлақ ауылында жаңа білім ошағының құрылысы ресми түрде басталды. Облыс әкімі Берік Уәли мектептің іргетасын қалау рәсіміне қатысып, тұрғындарды көптен күткен қуанышпен құттықтады.
Ескі мектеп апатты жағдайда
Суықбұлақтағы қазіргі бастауыш мектеп 1964 жылы балабақша ретінде салынған. Ғимарат тозып, апатты деп танылған. Онда спорт залы, кітапхана, медициналық пункт, мұғалімдер бөлмесі жоқ. 5-11 сынып оқушылары көрші ауылға автобуспен қатынап оқуға мәжбүр. Жаңа мектеп қажеттілігі бұған дейін де бірнеше рет көтерілген болатын.
«Облысымызда апатты жағдайда үш мектеп бар еді. Бірі – Семейде, бірі – Ақсуаттың Екпін ауылында, үшіншісі – осы Суықбұлақта. Енді міне, бүгін осы жерде жаңа мектептің іргетасын қалаудамыз», – деді облыс әкімі Берік Уәли.
Тұрғындардың көпжылдық арманы орындалды
Суықбұлақ тұрғындары бұл мектеп мәселесін 2011 жылдан бері көтеріп келген. Ауыл тұрғыны Ержан Кенжебекұлы:
«Сан жыл бойғы арманымыз орындалып отыр. Балалар енді көрші ауылға сабылмайды. Жаңа мектеп – біз үшін үлкен қуаныш», – деп алғысын білдірді.
Мектеп қандай болады?
-
100 оқушыға арналған.
-
Құрылыс мерзімі: 2026 жылдың сәуіріне дейін аяқталады.
-
Жалпы аумағы: 1 гектар.
-
Ғимарат көлемі: 1600 шаршы метр.
-
Екі қабатты, 12 оқу кабинеті және жеке спорт блогы қарастырылған.
-
Мектеп заманауи технологиялармен жабдықталады.
-
Сыртқы инфрақұрылым: демалыс алаңы, футбол, волейбол, баскетбол және гимнастика алаңдары болады.
Құрылысты осы ауылдан шыққан азаматтар жүзеге асырады. Облыс әкімі жергілікті тұрғындарды сапаны бірге бақылауға шақырды.
