Semeytany.kz – Абай облысында 18-21 маусым аралығында ХХҮІ республикалық «Абай оқулары» шығармашылық конкурсы өтіп жатыр. Көркемсөз байқауына еліміздің түкпір-түкпірінен ғана емес, шет елдерден де оқушылар қатысуда. Биылғы байқау ұлы ақынның 180 жылдығына орай халықаралық деңгейде ұйымдастырылған.
Байқау мақсаты – Абай мұрасын насихаттау
8–11 сынып оқушылары арасындағы дәстүрлі сайыстың мақсаты – Абай мен Шәкәрім шығармаларын кеңінен насихаттап, қазақ әдебиеті мен мәдениетіне қызығушылықты арттыру. Зияткерлік доданың ерекшелігі – әрбір қатысушы Абай шығармаларын жатқа айтуы тиіс.
Қатысушылар мен номинациялар
Жалпы байқауға 135-ке жуық оқушы қатысуда. Олар бес номинация бойынша сынға түседі:
-
«Абайдың асыл мұрасы»
-
«Абайдың ақын шәкірттері»
-
«Әнді сүйсең, менше сүй»
-
«Өлеңге әркімнің-ақ бар таласы»
-
«Сөз өнеріндегі Ұлы Абай бейнесі»
Шараға Қазақстан өңірлерінен бөлек, Моңғолия, Түрікменстан, Өзбекстан және Қытай елдерінен келген оқушылар да қатысып отыр.
Жидебайға экскурсия және марапаттау рәсімі
Байқау барысында қатысушылар Жидебайдағы Абай мұражайына экскурсияға барып, ұлы ақынның туған жерімен танысады. 20 маусымда шығармашылық сайыс өзге номинациялар бойынша жалғасады. Жеңімпаздарды 21 маусым күні марапаттау жоспарланған.
Марапаттар мен сыйлықтар
Абай оқуларының жеңімпаздары Қазақстан Республикасы Оқу-ағарту министрлігінің І, ІІ, ІІІ дәрежелі дипломдарымен және алтын, күміс, қола медальдармен марапатталады. Сонымен қатар, «Дарын» республикалық ғылыми-тәжірибелік орталығы грамоталар мен бағалы сыйлықтар тапсырады.
