Semeytany.kz – Бүгін Семей қаласында «Туған жерге туыңды тік» атты инвестициялық форум өз жұмысын бастады. Ауқымды шараға ҚР Парламенті мен Сенатының депутаттары, шетелдік және отандық инвесторлар, Абай өңірінен шыққан кәсіпкерлер мен қоғам қайраткерлері қатысты. Форумға 500-ге жуық кәсіпкер шақырылған.
Ашылу салтанатында облыс әкімі Берік Уәли өңірдің экономикалық әлеуеті туралы баяндама жасап, инвесторларды бірлесіп жұмыс істеуге шақырды. Оның айтуынша, Абай облысының табиғи ресурстары, инфрақұрылымы және географиялық орналасуы аймақтың тұрақты дамуына негіз бола алады.
– Бұл форум – пікір алмасып, келешекке бірге қадам басатын маңызды алаң. Бізге кәсіпкерлер мен инвесторлардың белсенділігі аса қажет. Семей – тарихи мәні зор өңір. Қазір біз жаңаша даму жолына бет бұрдық, – деді аймақ басшысы.
Форум аясында ұсынылған жобалар мен көрсеткіштер:
-
Облыс экономикасына бағытталған 38 жоба бар, жалпы құны – 2,7 трлн теңге.
-
2024 жылы 14,4 млрд теңгеге 8 жоба іске асып, 330 жұмыс орны ашылды.
-
2025 жылы 31,1 млрд теңгеге 10 жоба іске асырылып, 767 жұмыс орны құрылмақ.
-
2024 жылы нақты секторға тартылған инвестиция – 575,3 млрд теңге.
-
Шетелдік инвестиция көлемі – 775,3 млн АҚШ доллары.
Мәселен, биыл:
-
«СемАз» ЖШС жылына 6 мың арнайы техника шығаратын желіні іске қосады.
-
«Казполиграф» ЖШС қағаз және картон бұйымдарын өндіру көлемін 40 миллион данаға жеткізеді.
Шетелмен әріптестік:
Өткен айда Абай облысының делегациясы Қытайдың Шыңжаң өңіріне барып, 1,5 млрд АҚШ долларына тең 15 меморандумға қол қойды. Сол келісімдердің бірі негізінде Семейде чиптер мен электронды қондырғылар шығаратын зауыттың құрылысы басталды. Жоба құны – 50 млн АҚШ доллары.
Индустриялық аймақты кеңейту жоспарлануда
Қазіргі таңда Семей қаласындағы 96 гектарды құрайтын «Өндіріс» индустриялық аймағында 4 жоба іске асып жатыр. Өндіріс алаңына сұраныс артқан соң, бұл аймақты 600 гектарға дейін ұлғайту жұмыстары қолға алынады.
Форум аясында:
-
14 өзара ынтымақтастық меморандумына қол қойылмақ;
-
Өңірдің өндірістік және ауыл шаруашылығы әлеуетін таныстыратын көрме ұйымдастырылды;
-
Қонақтар облыс әкімімен бірге көрмені аралады.
Форумның басты мақсаты – туған жерге инвестиция тарту арқылы Абай өңірінің дамуына серпін беру.
