Semeytany.kz — Облыс әкімі Берік Уәли Бородулиха ауданына жасаған жұмыс сапары аясында тұрғындарды жеке мәселелері бойынша қабылдады. Қабылдауда көтерілген ұсыныстардың дені жол жөндеу, көше жарығы, мәдени және спорттық нысандар құрылысы, сондай-ақ абаттандыру мәселелеріне қатысты болды.
Атап айтқанда, тұрғындар Бақы ауылдық округіндегі «Ауыл–Коростели», «Новопокровка–Белағаш» бағыттарындағы жолдарды жөндеу қажеттігін жеткізді. Сонымен қатар Ауыл станциясында көшелерді жарықтандыру мен Бородулиха ауылындағы кейбір көшелерге асфальт төсеу мәселесі көтерілді.
Сондай-ақ Жерновка ауылына Мәдениет үйі, Жаңа Шүлбі ауылындағы жетім балаларға арналған интернат аумағына жабық хоккей алаңы қажет екені айтылды. Петропавловка ауылы ішіндегі жолдардың жайы да назардан тыс қалмады.
Облыс әкімі барлық ұсыныс-пікірді тыңдап, тиісті басқарма басшыларына нақты тапсырмалар жүктеді. Әр мәселе өз бақылауында болатынын жеткізді.
– Қабылдауда көтерілген мәселелердің бәрі мен үшін таныс. Биыл «Новопокровка–Белағаш» жолының 10 шақырымын жөндейміз, қалған 10 шақырым келесі жылға жоспарланған. Бородулиха ауылында да биыл үш көшеге асфальт төселеді. Қалғандары келер жылдың жоспарына енгізіледі. Ауданның инфрақұрылымдық мәселелерін кезең-кезеңімен шешеміз, – деді Берік Уәли.
Айта кетейік, облыс әкімінің қабылдауына дейін басқарма басшылары да тұрғындарды жеке қабылдап, сауалдарына жауап берді.
