Semeytany.kz — Бүгін Семейде Абай облыстық мәслихатының кезекті, жиырма сегізінші сессиясы өтіп, күн тәртібіндегі бірқатар маңызды мәселелер қаралды. Сессияда облыс әкімі Берік Уәли депутаттар алдында есеп беріп, өзіне жүктелген функциялар мен міндеттердің орындалуы туралы баяндады.
Аймақ басшысы 2024 жылдың қорытындысымен жалпы өңірлік өнім 4,3% өсіммен 3,2 трлн теңгеге жеткенін айтты. Өңірде жылумен және ауыз сумен қамту, жолдарды жөндеу, мектептер мен медициналық нысандар салу бағытында кешенді жұмыстар жүріп жатқаны атап өтілді.
Берік Уәли облысты басқаруға кіріскен уақыттан бастап барлық аудан мен қалаға, шалғай ауылдарға іссапармен барғанын айтты. Шар, Баршатас, Таскескен, Жаңа Шүлбі, Қайнар ауылдарында халықпен жүздесіп, жергілікті мәселелерді талдағанын жеткізді.
Инфрақұрылым және әлеуметтік сала
Семей, Курчатов, Аягөз қалалары мен Жарма ауданындағы Шуақ ауылында жылу желілері мен қазандықтарды жөндеуге 3,4 млрд теңге бөлінді. Ауыз су жобаларына 6,4 млрд теңге қарастырылып, 28 мыңнан астам адам таза сумен қамтамасыз етілмек.
«Жайлы мектеп» бағдарламасы аясында 3 мектеп пайдалануға берілді. Биыл 11 мектепке күрделі жөндеу жүргізіледі. Суықбұлақ пен Екпін ауылдарында жаңа мектептер салына бастады. Семейдегі апатты мектептер мәселесі де күн тәртібінде.
Медициналық инфрақұрылым бойынша Семейде жаңа облыстық аурухананың құрылысы басталды. Аягөзде көпсалалы аурухананың реанимация бөлімі ашылды.
Инвестициялық жобалар
Өңірде жалпы құны 2,7 трлн теңге болатын 38 инвестициялық жоба іске асырылуда. Бұл жобалар 8 мыңнан астам тұрақты жұмыс орнын құруға бағытталған. Осы сұранысқа байланысты «Өндіріс» индустриялық аймағының аумағы 96 гектардан 600 гектарға дейін ұлғайтылады.
Көпірлер мен жолдар
Семейдегі аспалы көпірдің бір бөлігіндегі жөндеу аяқталып, жол белгілері орнатылған соң пайдалануға берілмек. Ескі көпір құрылысының аяқталуына қатысты қаржылық мәселе министрлікпен пысықталуда.
Бюджет және ұсыныстар
Сессия барысында облыстық бюджеттің 2024 жылғы атқарылуы туралы есеп бекітіліп, бірқатар нормативтік-құқықтық құжаттарға өзгерістер енгізілді. Депутаттар білім беру, әлеуметтік сала және жол инфрақұрылымына қатысты сауалдар жолдады.
Облыс әкімі Президент тапсырмаларын жүзеге асыруда халық пен депутаттардың қолдауы аса маңызды екенін атап өтіп, алдағы міндеттер кезең-кезеңімен атқарылатынын жеткізді.
