Semeytany.kz — Семейде Абай Құнанбайұлының 180 жылдығына арналған «Абай елі – өнер кеніші» атты облыстық көркемөнерпаздар байқауының қорытынды гала концерті өтті. Абай атындағы театр сахнасында өткен шарада өңірдің он ауданынан іріктелген өнерпаздар өнер көрсетіп, ел мәдениетінің рухани қуатын паш етті.
Облыс әкімдігінің қолдауымен алғаш рет ұйымдастырылған байқауға мыңнан астам өнерпаз қатысты. Ән-күй, жыр-терме мен театрландырылған көріністер арқылы халқымыздың салт-дәстүрі мен ұлттық болмысы кеңінен насихатталды.
Гала концертке қатысқан облыс әкімі Берік Уәли көркемөнерпаздар сайысының жоғары деңгейде өткенін атап өтіп, байқау алдағы уақытта дәстүрлі түрде ұйымдастырылатынын жеткізді.
– «Абай елі – өнер кеніші» деген сөз бүгінде шындыққа айналды. Бұл байқау – өңіріміздің мәдени әлеуетін көрсеткен маңызды алаң. Аудандарда жүрген өнер иелерін үлкен сахнаға шығару – біздің басты міндетіміз. Мұндай жобалар ұрпақ тәрбиесіне, ұлттық құндылықтарды дәріптеуге қызмет етеді, – деді аймақ басшысы.
Байқау жеңімпаздары:
-
🥉 Үшінші орын – Үржар ауданы. Мәдениет үйіне толық жабдықталған дыбыс жазу студиясы табысталды.
-
🥈 Екінші орын – Аягөз ауданы. Музыкалық аппаратурамен марапатталды.
-
🥇 Бірінші орын – Абай ауданы. Жүлде ретінде ауданның Мәдениет үйіне шағын автобустың сертификаты мен кілті табыс етілді.
Сонымен қатар «Үміт», «Шабыт», «Дарын», «Өнер достығы», «Креативті үздік ұжым», «Ұлттық өнер дарабозы» және «Өнерлі өлке» номинациялары бойынша үздік ұжымдар 1 миллион теңгеден қаржылай сыйақы алды.
Облыстағы мәдениет саласының бүгінгі ахуалына тоқталған Берік Уәли өңірде 296 мәдениет мекемесінде 3000-ға жуық маман қызмет атқаратынын атап өтті. Олардың қатарында 137 кітапхана, 131 клуб, 10 музей, 9 архив, театр мен филармония бар.
Бұл байқау – ел ішіндегі өнерге деген құрметтің, талантқа көрсетілген қолдаудың жарқын көрінісі болды.
