Semeytany.kz – Абай облысында Бұқаралық ақпарат құралдары қызметкерлерінің кәсіби мерекесіне арналған салтанатты жиын өтті. Іс-шараға облыс әкімі Берік Уәли қатысып, өңірдегі журналистерді құттықтады.
Аймақ басшысы журналистерді ақиқат пен әділдіктің жаршысы, қоғам мен билік арасындағы дәнекер ретінде жоғары бағалап, олардың ел өміріндегі рөлін ерекше атап өтті.
– Біз сіздерді ақпарат таратушы ғана емес, халықтың жанайқайын жеткізуші, қоғамдық пікір қалыптастырушы, ел тағдырына араласатын азаматтар деп білеміз. Өзім де осы саладан шыққандықтан, журналистер қауымын әрқашан жақын көремін, – деді Берік Уәли.
Салтанатты жиын барысында саланың дамуына үлес қосқан бірқатар журналистерге мемлекеттік наградалар табысталды. Атап айтқанда, Президент Жарлығымен «Семей таңы» газетінің бас редакторы Риза Молдашева мен «SEMEI» телеарнасының шеф-редакторы Сайра Нүсіпбаева «Құрмет» орденімен марапатталды. «Abay Media Group» ЖШС директоры Мирас Малғаждаровқа «Шапағат» медалі берілді.
Бұған дейін Вера Кропачева Мемлекет басшысының қолынан «Ерен еңбегі үшін» медалін алған болатын. Сонымен қатар «Еңбек ардагері» төсбелгісі Ризвангүл Мұхамедоваға, «Ақпарат саласының үздігі» төсбелгілері Айман Шәріпхановаға, Кәусар Арықханқызына және Сая Семейхановаға табысталды.
Кәсіби мереке аясында облыс әкімінің жүлдесі үшін жарияланған байқаудың жеңімпаздары да марапатталды. «Әділетті Қазақстан», «Ауыл – ел бесігі», «Білімді ұлт», «Киелі Абай елі» секілді 10 номинация бойынша үздік танылған қалам иелеріне арнайы сыйлықтар мен алғыс хаттар тапсырылды.
Жиында сондай-ақ «Аягөз жаңалықтары» газетінің 95 жылдығы, «Абай елі» газетінің 90 жылдығы, «SEMEI» телеарнасының 60 жылдығы секілді мерейтойлар да атап өтілді.
