Semeytany.kz – Абай облысының әкімі Берік Уәли Мақаншы ауданына жұмыс сапары кезінде Алакөл туристік аймағын дамытуға арналған Бас жоспар тұжырымдамасымен танысты. Бұл құжат Мемлекет басшысының тапсырмасына сәйкес әзірленіп отыр.
Сәулет, қала құрылысы және жер қатынастары басқармасының басшысы Әнуар Бейсеновтің айтуынша, қазіргі таңда көл жағасында 300 гектарға жуық жағажай аймағы бар. Жаңа Бас жоспар аясында бұл аумақты ұлғайтып, сол жағалауды дамыту көзделуде. Себебі зерттеу нәтижесінде оң жағалаудың сазды жерде орналасқаны анықталған.
Бас жоспарды әзірлеу барысында Түркия мен Мысырдың жағажай инфрақұрылымын дамыту тәжірибесі негізге алынбақ. Жаңа стандарттар бойынша су жиегінен 100 метр қашықтықта тек құм жабыны болуы керек.
Облыс әкімі инфрақұрылымды әлемдік деңгейде дамыту қажеттігін атап өтті:
– Алакөлге келетін туристердің саны жылдан жылға артып келеді. Сондықтан жағажай аумағын кеңейтіп, туристер үшін барынша қолайлы жағдай жасауымыз қажет, – деді аймақ басшысы.
Көл жағалауында «Алакөл жағалауын бекіту» жобасы да таныстырылды. Аталған жобаны бұған дейін Жайық жағалауын бекіту жұмыстарын жүргізген тәжірибелі «ТЕКА Проект» компаниясы әзірлеуде. Құрылыс басқармасы – жобаның тапсырыс берушісі.
Сапар барысында облыс әкімі Қытайдан келген инвесторлармен бірге көл үстінде катерге отырып, бірқатар инвестициялық жобаларды талқылады. «Сан Бао», «Ванджан», «Juding Group» сынды компаниялар халықаралық мейманхана, эко-үйлер, су сарайы, ғарыш базасының сауықтыру кешені және ұлттық мәдениет көрме-сауық орталығы секілді нысандар салуға қызығушылық білдірді.
Инвесторлар алғашқы кезеңде жағажай маңына 100 ағаш үй жеткізіп, бірден орналастыруға дайын екендерін айтты. Аймақ басшысы жобаларды жергілікті компаниялармен бірігіп, концорциум негізінде жүзеге асыруды тапсырды.
– Алакөлдің Бас жоспары негізінде көлдің инфрақұрылымы жүйелі түрде дамытылады. Инвестор тарту жұмыстары жалғасады, – деді Берік Уәли.
