Semeytany.kz – Абай облысының әкімі Берік Уәли Қытай Халық Республикасының Алматы қаласындағы Бас консулы Цзян Вэймен кездесті. Кездесу барысында екі ел арасындағы сауда-экономикалық, инвестициялық және мәдени-гуманитарлық ынтымақтастықты кеңейту мәселелері талқыланды.
Облыс басшысы Абай облысының халықаралық әріптестікке, әсіресе көрші Қытаймен ынтымақтастықты дамытуға мүдделі екенін атап өтті.
– Қазақстан Президенті Қасым-Жомарт Тоқаевтың айтуынша, Қытай – еліміз үшін сенімді дос әрі экономикалық серіктес. Абай облысы мен Қытайдың Шыңжаң ұйғыр автономиялық ауданы арасында 250 шақырымнан астам шекара бар. Бұл – транзиттік және экономикалық қарым-қатынасты дамытуға үлкен мүмкіндік. Біз Аягөз – Тачэн теміржолын салып, құрғақ порт құру арқылы транзиттік әлеуетімізді күшейткіміз келеді. Бұл жобалар екі ел арасындағы тауар айналымын жаңа деңгейге шығарады, – деді аймақ басшысы.
Кездесу барысында консул Цзян Вэй де екіжақты ынтымақтастықты тереңдетуге мүдделі екенін білдіріп, Қытай тарапынан Абай облысындағы жобаларды қолдауға дайын екенін жеткізді. Ол Бақты кеден бекетін жаңғыртып, туристерге ыңғайлы «жасыл дәліз» ұйымдастыру идеясын ұсынды.
Сонымен қатар, Цзян Вэй білім саласында Семей медицина университетімен бірлескен жобалар құруға ниетті екенін айтты. Ол сондай-ақ облыс әкімін Шыңжаң Ұйғыр автономиялық ауданының Шәуешек қаласында өтетін халықаралық форумға шақырды. Кездесу барысында Тачен аймағы мен Абай облысы арасында экономикалық қарым-қатынасты нығайтуға баса назар аударылды.
