Semeytany.kz – Абай облысының әкімі Берік Уәли азаматтарды жеке сұрақтары бойынша қабылдады. Қоғамдық қабылдау облыс орталығындағы азаматтарды қабылдау орталығында өтті. Шараға қала және аудан әкімдері, сондай-ақ облыстық басқарма басшылары қатысты.
Қабылдау барысында тұрғындар түрлі әлеуметтік мәселелерін жеткізді. Атап айтқанда, тұрғын үймен қамтамасыз ету, мүгедектігі бар жандарға көрсетілетін қызмет сапасы, әлеуметтік жеңілдіктер, білім беру, ауыл шаруашылығын дамыту, жұмыс орындарын ашу секілді маңызды мәселелер көтерілді.
Мәселен, Семей қаласының тұрғыны Ольга Петровская ядролық сынақтардан зардап шеккен азаматтарға арналған біржолғы әлеуметтік төлемдерге қатысты шағымын айтты. Астана қаласынан келген С.Жексембаев ауыл шаруашылығы кооперативтері арқылы тұрақты жұмыс орындарын ашу жөнінде ұсыныс білдірді. Ал «Асыл» қоғамдық бірлестігінің өкілі Н.Игембаева әлеуметтік қызметкерлердің еңбекақысын көтеру мәселесін көтерсе, Эльмира Жүрсінбекқызы Желтоқсан оқиғасына қатысқан азаматтарға жеңілдіктер қарастыруды сұрады.
Аймақ басшысы әрбір өтінішті мұқият тыңдап, көтерілген мәселелер бойынша заң аясында тиісті түсініктеме берді. Облыс әкімі барлық сұрақтар өзінің жеке бақылауында болатынын айтып, жауапты басқарма басшыларына нақты тапсырмалар жүктеді.
